મોરબીના શનાળા રોડે સુપર માર્કેટમાં ચોરી કરતો ચોર સીસીટીવીમાં કેદ: વિડીયો થયો વાઇરલ 

મોરબી શહેરના સનાળા રોડ ઉપર નવા બસ સ્ટેન્ડની બાજુમાં આવેલ સુપરમાર્કેટમાં રાત્રી દરમિયાન અજાણ્યા શખ્સ દ્વારા દુકાનોનાં તાળાં ખોલીને દુકાનોમાંથી ચોરી કરવામાં આવેલ છે જોકે તસ્કરના હાથમાં મોટો દલ્લો આવ્યો ન હોવાથી આ અંગેની આજ સુધીમાં ચોરીની કોઈ ફરિયાદ મોરબી સીટી એ ડીવીઝન પોલીસ સ્ટેશન ખાતે નોંધાયેલ નથી પરંતુ આ પોલીસ નાઈટ પેટ્રોલીંગ સામે સો ટકા સવાલો ઉઠી રહ્યા છે. 

મોરબી શહેર તેમજ જિલ્લાની અંદર ક્રાઇમની ઘટનાઓમાં ચિંતાજનક રીતે વધારો થઈ રહ્યો છે જેથી કરીને લોકોની સલામતી સામે હવે પ્રશ્નો ઉભા થઇ રહ્યા છે અને હત્યા, ચોરી, લૂંટ સહિતના બનાવો ગમે ત્યારે બનતા હોય પોલીસ દ્વારા નાઈટ પેટ્રોલીંગની વાતો કરવામાં આવે છે જો કે, નક્કર વાસ્તવિકતા કંઇક જુદી જ હોય તેવું જોવા મળી રહ્યું છે મોરબી શહેરના સનાળા રોડ ઉપર નવા બસ સ્ટેન્ડની બાજુમાં આવેલ સુપરમાર્કેટમાં તસ્કર દ્વારા જુદી જુદી દુકાનોના તાળા તોડીને ત્યાંથી પરચૂરણ રકમોની ચોરી કરવામાં આવી હોવાનું સામે આવ્યું છે અને આ અંગેનો સીસીટીવી કેમેરાનો વીડિયો પણ વાયરલ થઇ રહ્યો છે. 

મોરબીના સુપરમાર્કેટની દુકાન ધરાવતા વેપારી પાસેથી જાણવા મળતી વિગત પ્રમાણે ગત તા. ૨૬ ના રોજ વહેલી સવારે સાડા ચાર વાગ્યાના અરસામાં કોઈ અજાણ્યો શખ્સ પોતાના મોઢા ઉપર બુકાની બાંધીને મોરબીના સુપરમાર્કેટની અંદર જ્યાં ૨૫૦ કરતાં વધુ દુકાનો આવેલ છે ત્યાં જુદી જુદી લોબીનોમાં જોવા મળ્યો હતો અને તેના દ્વારા જુદી જુદી દુકાનોના તાળાં તોડવા નહીં પરંતુ ખોલવા માટેની કામગીરી કરવામાં આવતી હોય તેવું સીસીટીવી કેમેરાની અંદર સ્પષ્ટપણે દેખાઇ રહયું છે અને કેટલીક દુકાનનાં તાળાં ખૂલી ગયા હોવાથી આ શખ્સ દ્વારા તે દુકાનની અંદર પ્રવેશ કરીને પરચૂરણ રકમ અને અન્ય મુદ્દામાલની ચોરી કરવામાં આવી છે. 

જોકે ચોરીના આ બનાવમાં તસ્કરના હાથમાં મોટો દલ્લો લાગ્યો ન હોવાનું સૂત્રો પાસેથી જાણવા મળી રહ્યું છે અને ચોરીના આ બનાવ અંગે મોરબી સીટી એ ડીવીઝન પોલીસ સ્ટેશન ખાતે હજુ સુધી કોઈ પણ પ્રકારની ફરિયાદ નોંધાયેલ નથી પરંતુ પ્રશ્ન એ ઊભો થાય છે કે રાત્રી દરમ્યાન પોલીસ દ્વારા નાઈટ પેટ્રોલીંગ કરવામાં આવે છે તેમ છતાં પણ રાત્રે તસ્કરો બેખોફ બનીને ચોરીની ઘટનાને અંજામ આપતા હોય તેવું હાલમાં જે સીસીટીવી કેમેરાના ફૂટેજ વાયરલ થયા છે તેના ઉપરથી સ્પષ્ટપણે દેખાઇ રહયું છે ત્યારે લોકોની  સલામતી માટે સઘન નાઈટ પેટ્રોલીંગ કરવામાં આવે તેવી વેપારીઓની માંગ છે.