મોરબીના વાવડી રોડ ઉપર રહેતો યુવાન કામે જવા માટે તેને ઘરેથી નીકળ્યો હતો ત્યારબાદ તે જુના બસ સ્ટેન્ડ પાસેથી ગુમ થઈ ગયો હતો ગુમ થયેલા યુવાનના ભાઈએ મોરબી એ ડિવિઝન પોલીસ સ્ટેશન ખાતે જાણ કરી હતી. દરમિયાન ગુમ યુવાન રાજકોટથી મળી આવ્યો હતો.

મોરબીના વાવડી રોડ ઉમિયા પાર્કમાં રહેતા વેપારી યુવાન નવીનભાઈ ધીરજભાઈ છત્રોલા જાતે પટેલ (૨૩) એ મોરબી સીટી એ ડિવિઝન પોલીસ સ્ટેશન ખાતે તેનો ભાઈ હિરેન ધીરજભાઈ છત્રોલા (૨૦) ગુમ થયો હોવા અંગે થોડા દિવસો પહેલા જાણ કરીને જણાવ્યુ હતુ કે, વાવડી રોડ ઉપર આવેલ ઉમિયાપાર્કમાંથી મોરબીના શનાળા રોડ ઉપર આવેલ તુલસી દસ્તાવેજની ઓફિસે તે કામ કરતો હોય ત્યાં જવા માટે નીકળ્યો હતો અને ત્યારબાદ તે મોરબીના જુના બસ સ્ટેશન પાસેથી ગુમ થઈ ગયો હતો.દરમિયાનમાં ગુમ થયેલ યુવાનની ભાળ મળી હતી અને તેમાં ખુલ્યું હતું કે ગત તા.૧૦-૪ ના સવારે તુલસી દસ્તાવેજ કામે ગયેલ ત્યારે ત્યાંથી તેને ટંકારા ખાતે ટોકન લેવા જવા માટે જણાવવામાં આવતા તે બાઈકમાં ટંકારા જતા બાઈકના સાઇલેન્સરમાં પગે ફોડલો થઈ ગયો હતો અને પગે અગાઉ ફ્રેકચર થયું હતું જેમાં પણ પાંચેક લાખ જેવો અગાઉ ખર્ચ થયો હતો જેથી ઘરે જવામાં માતા-પિતાની બીક લાગતા તે જાતે જુના બસ સ્ટેન્ડથી સામેકાંઠે ત્રાજપર ચોકડી થઈ ચોટીલા પહોંચ્યો હતો અને ત્યાં રોકાયા બાદ અમદાવાદ ગયો હતો અને અમદાવાદ ખાતે કાંકરિયા, રિવરફ્રન્ટ વગેરે જગ્યાએ રોકાયા બાદ ત્યાં નાસ્તો કરી બસ સ્ટેન્ડમાં સૂઈ ગયો હતો અને બાદમાં ઘરની યાદ આવતા રાજકોટ પહોંચ્યો હતો અને ત્યાં રાજકોટ ગ્રીનલેન્ડ ચોકડીએ પહોંચી કોઈના ફોનમાંથી પોતાના ભાઈને જાણ કરી હતી અને પોતાને તેડી જવા જણાવતાં તેનો ભાઈ રાજકોટ ગયો હતો અને ત્યાંથી ગુમ થયેલા હિરેન છત્રાલાને શોધીને ઘરે લાવ્યો હતો જે અંગે હાલ પોલીસને નોંધ કરી આગળની તપાસ હાથ ધરી છે.

મારામારીમાં મહિલાને ઇજા

મોરબીના વીસીપરામાં આવેલ વિજયનગર વિસ્તારમાં રહેતા સબીનાબેન માંગુભાઈ પારઘી નામના ૨૭ વર્ષીય મહિલાને તેના રહેણાંક નજીક કોઈ બાબતે થયેલ ઝઘડા બાદ મારામારીના બનાવમાં ઇજાઓ પહોંચતા સારવાર માટે સિવિલે લાવવામાં આવ્યા હતા જેથી એ ડિવિઝન પોલીસ મથકના હરેશભાઈ મકવાણા દ્વારા આ અંગે આગળની તપાસ ચલાવવામાં આવી રહી છે જ્યારે મોરબીના માળિયા મિંયાણા ખાતે આવેલ કાજરડા ગામે ઘર પાસેથી સાયકલ લઈને જતા સમીર અસલમભાઈ મોવર નામના ૧૫ વર્ષના સગીરને કોઇ બાઈક ચાલકે હડફેટે લેતા ઇજા પામેલ સમીર મોવરને સારવાર માટે અહીંની સમર્પણ હોસ્પિટલે લઈ જવામાં આવ્યો હતો બનાવ સંદર્ભે નોંધ કરી હાલ પોલીસને જાણ કરાતા માળિયા પોલીસે આગળની તપાસ હાથ ધરી છે.