મોરબી પોલીસમાં કરેલ ખોટી અરજીમાં ગુનો દાખલ ન કરવા માટે માંગેલી લાંચ સ્વીકારતા હેડ કોન્સટેબલ રંગે હાથે પકડાયો

મોરબીના નાની વાવડી ગામે પ્લોટની ખરીદી કરનારા સામે પોલીસમાં ખોટી અરજી કરવામાં આવી હતી જે અરજીમાં ગુનો દાખલ ન કરવા માટે અને અરજીનો નિકાલ કરવા માટે 2.50 લાખની લાંચની માંગણી કરી હતી અને તે પૈકીનાં 2.35 લાખ રૂપિયા સ્વીકારતા મોરબી એ ડિવિઝન પોલીસ સ્ટેશનમાં ફરજ બજવતો હેડ કોન્સેટબલ એસીબીના છટકામાં રંગે હાથે લાંચ લેતા ઝડપાઈ ગયો હતો જેથી એસીબી પોલીસ સ્ટેશનમાં તેની સામે ગુનો નોંધીને પોલીસે આરોપીના રિમાન્ડ લેવા માટેની તજવીજ શરૂ કરેલ છે અને અન્ય કોઈ અધિકારીની સંડોવણી છે કે કેમ તે દિશામાં પણ તપાસ કરવામાં આવશે.

મોરબી એ ડિવિઝન પોલીસ સ્ટેશન વિસ્તારમાં આવતી નહેરુ ગેટ પોલીસ ચોકીમાં ફરજ બજાવતો હિતેશભાઈ મકવાણા નામનો હેડ કોન્સટેબલ અરજદાર પાસેથી દલવાડી ચાર રસ્તા પાસે આવેલ સુરેશ પાન પાર્લરની બાજુમાં લાંચ સ્વીકારતા ગઇકાલે મોડી સાંજે રંગે હાથ ઝડપાઈ ગયો હતો જેથી એસીબીની ટીમ દ્વારા તેને મોરબીના વીસીપરા વિસ્તારમાં આવેલ એસીબી પોલીસ સ્ટેશન ખાતે લઈ જવામાં આવ્યો હતો અને તેની સામે ગુનો નોંધીને પોલીસે આગળની કાર્યવાહી કરેલ છે અને હાલમાં જે ફરિયાદ નોંધાયેલ છે તેમાં જણાવ્યુ છે કે, અરજદાર ફરીયાદીએ તા. 6/9/24 ના રોજ મોરબીના નાની વાવડી ગામે પ્લોટની ખરીદ કરી હતી અને તે બાબતે નગર દરવાજા પોલીસ ચોકી ખાતે ખોટી રીતે દસ્તાવેજ કર્યા બાબતે એક અરજી કરવામાં આવી હતી જે અરજીમાં ગુનો દાખલ ન કરવા અને આ અરજીના નિકાલ માટે અરજદાર પાસેથી 2.50 લાખની લાંચ માંગી હતી અને તે પૈકીનાં 2.35 લાખ રૂપિયા આરોપીએ સ્વીકારતાની સાથે જ તેની એસીબીની ટીમે ધરપકડ કરી હતી અને આ આરોપીના રિમાન્ડ લેવા માટેની તજવીજ હાથ ધરવામાં આવી છે અને આ લાંચની રકમ સ્વીકારવામાં અન્ય કોઈ અધિકારી હેડ કોન્સટેબલ સાથે સામેલ છે કે કેમ તે દિશામાં પણ તપાસ કરવામાં આવશે.