હળવદના ટીકર ગામે યોજાયેલ આમ આદમી પાર્ટીની જનસભામાં ઈશુદાન ગઢવીએ ભાજપ ઉપર કર્યા આકરા પ્રહાર

આગામી સમયમાં સ્થાનિક સ્વરાજની ચૂંટણીના ભણકારા વાગી રહ્યા છે ત્યારે આમ આદમી પાર્ટી દ્વારા મોરબી જિલ્લાના જુદાજુદા વિસ્તારોમાં સભાઓ કરવામા આવી રહી છે તેવામાં હળવદ તાલુકાનાં ટીકર ગામે આમ આદમી પાર્ટીના પ્રદેશ પ્રમુખ ઈશુદાન ગઢવીની હાજરીમાં જનસભાનું આયોજન કરવામાં આવ્યું હતું ત્યારે ઘણા લોકો આમ આદમી પાર્ટીની સાથે જોડાયા હતા ત્યાર બાદ સભાને સંબોધતા ઈશુદાન ગઢવીએ ભાજપ ઉપર આકરા પ્રહારો કર્યા હતા અને કહ્યું હતું કે, ભાજપ અને કોંગ્રેસ બંને તેને આવકારવા માટે તૈયાર હતા પરંતુ તે રાજકારણ કરવા માટે આવેલ નથી રાજકારણમાં પરીવર્તન માટે આપમાં જોડાય છીએ અને લોકોના આશીર્વાદથી ગુજરાતમાં પરીવર્તન આવશે તેમાં શંકાને કોઈ સ્થાન નથી.

હળવદ તાલુકાનાં ટીકર ગામે આજે આમ આદમી પાર્ટીના પ્રદેશ પ્રમુખ ઈશુદાન ગઢવીની જાહેર સભાનું આયોજન કરવામાં આવ્યું હતું જેમાં પ્રદેશના આગેવાન રાજુભાઇ કપરાડા ઉપરાંત મોરબી જિલ્લા આમ આદમી પાર્ટીના પ્રભારી પંકજભાઈ રાણસરિયા, જિલ્લાના પ્રમુખ મહાદેવભાઇ પટેલ, કે.ડી.બાવરવા, ડોક્ટર રાણા સહિતના આગેવાનો હાજર રહ્યા હતા અને ત્યારે રાજુભાઇ કપરાડા, પંકજભાઈ રાણસરિયા તથા મહાદેવભાઇ પટેલ દ્વારા વર્તમાન સમયમાં લોકો જે જુદીજુદી સમસ્યાઓથી પીડાઈ રહ્યા છે તેના ઉકેલ માટે આમ આદમી પાર્ટીના આગેવાનો તમારી સાથે જ છે અને જરૂર પડે તો આંદોલન કરવા માટે પણ લોકોની સાથે રહેશે. કેમ કે, વર્ષોથી સત્તામાં ભાજપ હોવા છતાં પણ આજની તારીખે મોટાભાગના વિસ્તારોમાં લોકો લાઇટ, પાણી રોડ રસ્તા જેવી સુવિધા મળતી નથી અને લોકો હેરાન થાય છે ત્યારે હવે સતાધીશોને તેનું સ્થાન બતાવવાનો સમય આવી ગયો છે.

ત્યારબાદ આમ આદમી પાર્ટીના ઈશુદાન ગઢવી દ્વારા સભાને સંબોધવામાં આવી હતી ત્યારે તેમણે કહયું હતું. ચાર વર્ષ પહેલા જ્યારે રાજકારણમાં આવવાની જાહેરાત કરી હતી ત્યારે ભાજપ અને કોંગ્રેસ બંને આવકારવા માટે તૈયાર હતા જો કે, હું રાજકારણ કરવા માટે નહીં પરંતુ વર્તમાન સમયમાં જે રાજકારણ કરવામા આવે છે તેમાં પરીવર્તન લાવવા માટે રાજકારણમાં આવ્યો છો. ગુજરાતનાં જુદાજુદા વિસ્તારમાં લોકોના અનેક પ્રશ્ન છે જો કે, તેનો ઉકેલ કેમ લાવવામાં આવતો નથી તે સૌથી મોટો સવાલ છે. અને સરકારે 15 વર્ષે વાહન બદલાવવા માટેનો નિયમ બનાવેલ છે તો પછી 30-30 વર્ષથી ભાજપ છે તેને ગુજરાતમાં હવે બદલી નાખો અને એક વખત આમ આદમી પાર્ટીને મોકો આપો અને જો આપની આશા અને અપેક્ષા ઉપર ખરા ન ઊતરીએ તો અમને પણ બદલી નાખજો.