મોરબી નજીક કારને હડફેએ લઈને અકસ્માત સર્જીને મહિલાનું મોત નિપજાવનાર ડમ્પર ચાલક સામે ગુનો નોંધાયો

મોરબી વાંકાનેર હાઇવે રોડ ઉપર આવેલ લાલપર ગામ નજીક થોડા દિવસો પહેલા અકસ્માતનો બનાવ બનેલ હતો જેમાં કારમાં જઇ રહેલા એક જ પરિવારના બાળક સહિત કુલ ત્રણ વ્યક્તિઓને ઈજાઓ થઈ હતી જેમાં મહિલાને ગંભીર ઇજા થઈ હોવાના કારણે તેનું મોત નીપજ્યું હતું જે બનાવ સંદર્ભે યુવાને મોરબી તાલુકા પોલીસ સ્ટેશન ખાતે ડમ્પરના ચાલક સામે ફરિયાદ નોંધાવતા પોલીસે ગુનો નોંધીને આરોપીઓને પકડવા માટે તજવીજ શરૂ કરેલ છે.

વાંકાનેરમાં આવેલ વિવેકાનંદ સોસાયટીના પ્લોટ નં-70 માં રહેતા ભાવિનભાઈ પ્રવીણભાઈ રાવલ (36)એ ડમ્પર નંબર જીજે 37 ટી 6944 ના ચાલક સામે ફરિયાદ નોંધાવેલ છે જેમાં જણાવ્યું છે કે, ગત તા. 2/11 ના રોજ તેઓ પોતાના પત્ની ધારાબેન તથા દીકરા નીલ સાથે વાંકાનેરથી તેઓની કાર નંબર જીજે 36 એસી 9413 લઈને વાંકાનેરથી તેમના ઘરે ધાંગધ્રા તાલુકાના કંકાવટી ગામ ખાતે માતાજીના પ્રસંગમાં જઈ રહ્યા હતા ત્યારે લાલપર ગામ નજીક પ્રિયા ગોલ્ડ સિરામિક સામે ડમ્પરના ચાલકે તેનું વાહન બેફિકરાઈથી ચલાવીને ફરિયાદીની કારને પાછળના ભાગેથી હડફેટે લઈને અકસ્માત કર્યો હતો જે બનાવમાં ફરિયાદી તથા તેના છ વર્ષના દીકરા નીલને નાના મોટી ઈજાઓ થઈ હતી જોકે કારમાં બેઠેલ ફરિયાદીના પત્ની ધારાબેન (35)ને માથાના ભાગે ગંભીર રીતે ઇજા થઈ હતી જેથી તેનું મોત નીપજ્યું હતું અને ડમ્પર ચાલક અકસ્માત થયા બાદ પોલીસને જાણ કર્યા વગર પોતાનું ડમ્પર સ્થળ ઉપર મૂકીને નાસી ગયો હતો જેથી આ બનાવ સંદર્ભે ભોગ બનેલા યુવાને નોંધાવેલ ફરિયાદ આધારે પોલીસે ગુનો નોંધી આરોપીને પકડવા માટે તજવીજ શરૂ કરેલ છે