મોરબીનો મચ્છુ-3 ડેમ 100 ટકા ભરાયો: 2 દરવાજા 1 ફૂટ  ખોલ્યા: 2 તાલુકાના 21 ગામોને એલર્ટ કરાયા

મોરબીના જુના સાદુળકા ગામ પાસે મચ્છુ-3 ડેમ આવેલ છે અને તેમાં સતત પાણીની આવક ચાલી રહી છે જેથી કરીને હાલમાં ડેમ 100 ટકા ભરાઈ ગયો છે અને ડેમમાં પાણીની આવક ચાલુ હોવાથી વધારાના પાણીને મચ્છુ નદીમાં છોડવા માટે સિંચાઇ વિભાગ દ્વારા ડેમના 2 દરવાજાને 1 ફૂટ સુધી શુક્રવારે સાંજે 6 વાગ્યાથી ખોલવા માટેનું આયોજન કરવામાં આવ્યું હતું જેથી કરીને કુલ મળીને 21 ગામમાં લોકોને એલર્ટ કરવામાં આવેલ હતા.

મોરબીમાં આવેલા 10 ડેમ પૈકી અગાઉ બ્રહ્માણી -2 ડેમમાં રૂલ લેવલ સુધી ભરાયો હતો જેથી તેના દરવાજાને ખોલવામાં આવેલ હતો ત્યાર બાદ મચ્છુ-૩ ડેમ 100 ટકા ભરાઈ ગયો છે જેથી આ ડેમના બે દરવાજાને ખોલવાના હતા જો કે, તે પહેલા ડેમની નીચે આવેલા મોરબી તાલુકાના ગોર ખીજડીયા, વનાળીયા, માનસર, નારણકા, નવા સાદુળકા, જુના સાદુળકા, રવાપર (નદી), ગુંગણ, જુના નાગડાવાસ, નવા નાગડાવાસ, અમરનગર, બહાદુરગઢ અને સોખડા તેમજ માળિયા(મીં) તાલુકાના દેરાળા, મેઘપર, નવાગામ, રાસંગપર, વિરવદરકા, માળિયા(મીં), હરીપર અને ફતેપર સહિત એકંદર ૨૧ ગામોના નાગરિકોને એલર્ટ કરવામાં આવ્યા છે. તેમજ સિંચાઇ વિભાગ દ્વારા નદીકાંઠાના વિસ્તારોમાં રહેતા ગ્રામજનોને નદીના પટમાં અવરજવર ન કરવા માટેની સૂચના આપવામાં આવેલ હતી. તેમજ માલધારીઓએ તેઓના માલ-ઢોરને સલામત સ્થળે ખસેડી લેવા માટેની પણ સૂચના આપવામાં આવેલ હતી.