મોરબી નજીક શરૂ કરાયેલ નકલી વિદેશી દારૂની ફેકટરીનું કનેક્શન ગોંડલના ગુજસીટોકના આરોપીઓ સુધી પહોચ્યું !

મોરબીના રફાળેશ્વર ગામ પાસે આવેલ જીઆઇડીસી વિસ્તારમાં આવેલ બાલાજી એન્ટરપ્રાઇઝ નામના ગોડાઉનમાં એલસીબીની ટીમે રેડ કરી હતી ત્યારે ત્યાં હરિયાણાના એક શખ્સે ગોડાઉન ભાડે રાખીને નકલી વિદેશી દારૂ બનાવવાની ફેકટરી ચાલુ કરી હોવાનું સામે આવ્યું હતું જે ગુનામાં જે તે સમયે ત્યાં કામ કરતાં ૧૧ શખ્સોની ૧૫.૬૫ લાખનો મુદામાલ સાથે ધરપકડ કરી હતી અને ત્યાર બાદ પોલીસે નકલી વિદેશી દારૂ બનાવવાની ફેકટરી ચાલુ કરનારા માસ્ટર માઇન્ડની ધરપકડ કરેલ હતી અને તેના રિમાન્ડ મેળવ્યા હતા જો કે, રિમાન્ડ પૂરા થતાં આરોપીને જેલ હવાલે કરવામાં આવેલ છે અને મોરબીની નકલી દારૂની ફેક્ટરીનું કનેક્શન ગોંડલના ગુજસીટોકના આરોપી સુધી પહોચ્યું હોવાનું સૂત્રો પાસેથી જાણવા મળેલ છે

ગુજરાતમાં પંજાબ, હરિયાણા, રાજસ્થાન, ગોવા વિગેરે સેંટરોમાંથી વિદેશી દારૂ યેનકેન પ્રકરે લાવવામાં આવે છે જો કે, બહારથી દારૂ મંગાવવામાં આવે તો પકડવાનો ડર છે છે જેથી મોરબીના રફાળેશ્વર ગામ પાસે આવેલ જીઆઇડીસી વિસ્તારમાં આવેલ બાલાજી એન્ટરપ્રાઇઝ નામના ગોડાઉનમાં હરિયાણાના શખ્સે નકલી દારૂ બનાવવા માટેની ફેક્ટરી શરૂ કરી હતી ત્યાં થોડા સમય પહેલા એલસીબીની ટીમે રેડ કરી હતી ત્યારે પોલીસે સ્થળ ઉપરથી જુદીજુદી  બ્રાન્ડની નકલી દારૂ ભરેલી ૨૮૩૨ બોટલ જેની કિંમત ૧૦,૬૨,૦૦૦ તેમજ બનાવટી ઈંગ્લીશ દારૂનું પ્રવાહી ૨૫૦૦ લીટર જેની કિંમત ૧,૨૫,૦૦૦ તેમજ જુદી જુદી દારૂનો ખાલી કાચની બોટલ, ઢાંકણા, પેકીંગ મશીન, સ્ટીકર, કેમિકલ પાવડર તેમજ ૬ મોબાઈલ મળીને પોલીસે ૧૫,૬૫,૩૦૦ નો મુદામાલ કબજે કરેલ હતો આ ગોડાઉન હરિયાણાના સિરસાના રહેવાસી સુરેશકુમાર આત્મારામ ડુકીયાએ ભાડે રાખ્યું હતુ અને ત્યાં નકલી દારૂની બોટલો ભરવા માટેની કામગીરી માટે માણસોને કામે લગાડ્યા હતા તે ૧૧ આરોપીની પોલીસે જે તે સમયે ધરપકડ કરી હતી અને મોરબી તાલુકા પોલીસ સ્ટેશન ખાતે ગુનો નોંધીને મુખ્ય સુત્રાધારને પકડવા માટે તજવીજ શરૂ કરી હતી

આ ગુનામાં મુખ્ય સુત્રાધાર દીપકકુમાર સુરેન્દ્રકુમાર પાંડે જાતે બ્રાહ્મણ (૨૫) રહે. સમેરપુર બિહાર તાલુકો બિધાપૂર જિલ્લો ઉનાઉ યુપી વાળાની હરિયાણાના જજર જિલ્લામાંથી ધરપકડ કરેલ હતી અને આ આરોપીને કોર્ટમાં રજૂ કરીને તેના રિમાન્ડ મેળવ્યા હતા જો કે, રિમાન્ડ પૂરા થતાં તે આરોપીને જેલ હવાલે કરવામાં આવેલ છે અને આ ગુનામાં હજુ ગોડાઉન ભાડે રાખનારા સુરેશકુમાર આત્મારામ ડુકીયાને પકડવાનો બાકી છે તેવામાં સૂત્રો પાસેથી મળેલ માહિતી મુજબ આરોપી દીપકકુમાર સુરેન્દ્રકુમાર પાંડેએ જુદાજુદા રાજ્યોમાં કાયદેસરનો દારૂ બનાવવા માટેની ફેક્ટરીઓ આવેલ છે ત્યાં ઘણા વર્ષો સુધી કામ કર્યું હતું જેથી કયું કેમિકલ કેટલું મિક્ષ કરવાથી વિદેશી દારૂ બને તેની માહિતી તેની પાસે હતી અને તે પોતે જ જુદાજુદા કેમિકલ મિક્ષ કરીને દારૂ બનાવતો હતી ત્યાર બાદ મજૂરો તેને બોટલમાં ભરવાનું કામ કરતાં હતા વધુમાં મળતી માહિતી મુજબ આ ગુનાની તપાસના તાર ગોંડલના ગુજસીટોકના આરોપી સુધી પહોચ્યું છે અને નકલી ફેક્ટરી શરૂ કરનારા બંને શખ્સો ગોંડલના ગુજસીટોકના આરોપી વિજય, નરેશ અને અજયના સંપર્કમાં હતા જેથી કરીને પોલીસે આ ગુનામાં તેને પણ પકડવા માટે ચક્રોગતિમાન કરેલ છે