માળીયા (મી) નજીક ડમ્પરના ઠાંઠામાં એસટી બસ અથડાતાં અકસ્માત: ડ્રાઈવર સહિત બેને ઇજા થતાં સારવારમાં

માળીયા કચ્છ હાઇવે રોડ ઉપર આવેલ આરામ હોટલ સામેથી એસટી બસ પસાર થઈ રહી હતી ત્યારે આગળ જતા અજાણ્યા ડમ્પરના ઠાંઠામાં બસનો ખાલી સાઇડનો ભાગ અથડાયો હતો જેથી કરીને ડ્રાઇવર અને મુસાફરને ઇજાઓ થયેલ હતી જેથી તેને સારવાર માટે લઈ ગયા હતા અને આ બનાવ સંદર્ભે બસના કંડકટર દ્વારા એસટી બસના ડ્રાઈવર સામે માળિયા તાલુકા પોલીસ સ્ટેશન ખાતે ફરિયાદ નોંધાવવામાં આવતા પોલીસે આગળની કાર્યવાહી હાથ ધરી છે

જાણવા મળતી માહિતી પ્રમાણે મૂળ પંચમહાલ જિલ્લાના ડોકવા બારીયા ફળિયુંના રહેવાસી અને એસટી વિભાગમાં કંડકટર તરીકે ફરજ બજાવતા જગતસિંહ ઉદેસિંહ મકવાણા (55)એ હાલમાં એસટી બસ નંબર જીજે 18 ઝેડ 1296 ના ડ્રાઇવર કનુભાઈ ભીમાભાઇ બારીયા રહે. હડપ મોરવા જીલ્લો પંચમહાલ વાળાની સામે માળિયા તાલુકા પોલીસ સ્ટેશન ખાતે ફરિયાદ નોંધાવી છે જેમાં તેને જણાવ્યુ છે કે, કચ્છ માળીયા હાઇવે રોડ ઉપર આવેલ આરામ હોટલ પાસેથી આરોપી પોતાના હવાલા વાળી એસટી બસ લઈને પસાર થઈ રહ્યો હતો ત્યારે પોતાની તથા બસમાં બેઠેલા મુસાફરોની જિંદગી જોખમાઈ તે રીતે આગળ જઈ રહેલા અજાણ્યા ડમ્પરના ઠાઠામાં બસનો ખાલી સાઇડનો ભાગ અથડાવ્યો હતો જેથી બસમાં બેઠેલા મુસાફરો પૈકી કૈલાશભાઈ મકનભાઈ પરમારને દાઢીના ભાગે ઇજા થઈ હતી જ્યારે બસના ડ્રાઇવરને જમણા પગે એડીના ભાગે ઇજા થતાં પાંચ ટકા આવ્યા હતા અને પેટ તેમજ ડાબી આંખ ઉપરના ભાગે ઈજા થઈ હતી જેથી તે બંને સારવારમાં લઈ ગયા હતા અને હાલમાં બસના કંડકટર દ્વારા નોંધાવવામાં આવેલ ફરિયાદ આધારે પોલીસે બસના ડ્રાઇવર સામે ગુનો નોંધીને આરોપીને પકડવા માટે તજવીજ હાથ ધરી છે.