મોરબીમાં પ્રાથમિક સુવિધાની માંગ સાથે કોંગ્રેસ કરશે મહાપાલિકાનો ઘેરાવ

મોરબીમાં આજની તારીખે પ્રાથમિક સુવિધા માટે લોકો હેરાન છે ત્યારે લોકોને પાયાની સુવિધાઓ મળી રહે તેના માટે હવે કોંગ્રેસ મેદાનમાં આવી છે અને આગામી સોમવારે લોકોને સાથે રાખીને મહાપાલિકાનો ઘેરાવ કરવાની ચીમકી કોંગ્રેસનાં પ્રમુખે ઉચ્ચારી છે અને લોકોને તેઓની સાથે જોડાવા માટેનું આહ્વાન કર્યું છે.

મોરબી શહેર કોંગ્રેસ પ્રમુખ પુષ્પરાજસિંહ જાડેજાએ સોશયલ મીડિયામાં એક વિડીયો મૂક્યો છે જેમાં જણાવ્યું છે કે મોરબીના લાતી પ્લોટ, આલાપ રોડ, શ્રી કુંજ સોસાયટી, મહેન્દ્રનગર, ઇન્દીરાનગર, એલઇ કોલેજ રોડ સહિતના વિસ્તારોમાં રોડ રસ્તા બિસ્માર છે તે સહિતના પ્રાથમિક સુવિધાને લગતા જે પ્રશ્નો છે તેને લઈને લોકો આંદોલન કરે એટ્લે રસ્તા ઉપર મોરમ નાખે છે જો કે, બે ઇંચ વરસાદમાં બધું હતું એવું ને એવું થઈ જાય છે જેથી મોરબીના લોકો કરોડોનો ટેક્સ જમા કરાવે તો પણ તેઓને સારી પ્રાથમિક સુવિધાઓ આપવામાં આવી રહી નથી જેથી પ્રજાના હક્ક માટે કોંગ્રેસ લડાઈના મંડાણ કરશે અને આગામી સોમવારે કોંગ્રેસ સ્થાનિક લોકોને સાથે રાખીને મહાપાલિકા કચેરીનો ઘેરાવ કરશે ત્યારે મોરબીના ગાંધી ચોક ખાતે સવારે 11 વાગ્યે લોકોને આવવા માટે કોંગ્રેસનાં આગેવાનોએ આહ્વાન કર્યું છે.