વાંકાનેરના માટેલ રોડે દુકાન ભાડે રાખીને તેમાં રહેતા કોન્ટ્રાકટર યુવાનની માથામાં બોથડ પદાર્થનો ઘા મારીને હત્યા

વાંકાનેરના ઢુવા માટેલ રોડ ઉપર ખોડિયાર ચેમ્બર દુકાન નંબર 12 માં કોઈ અજાણ્યા શખ્સ દ્વારા યુવાનને માથાના ભાગે બોથડ પદાર્થ મારીને તેની હત્યા કરવામાં આવી છે જે બનાવ સંદર્ભે હાલમાં વાંકાનેર તાલુકા પોલીસ સ્ટેશન ખાતે અજાણ્યા શખ્સની સામે હત્યાનો ગુનો નોંધીને પોલીસે આરોપીને પકડવા માટે તજવીજ હાથ ધરી છે.

બનાવની જાણવા મળતી માહિતી મુજબ વાંકાનેર તાલુકાના કાછિયાગાળા ગામે રહેતા અને કોન્ટ્રાક્ટરનું કામ કરતા દેવજીભાઈ સોમાભાઈ ઝરવરીયા (31)એ અજાણ્યા શખ્સની સામે વાંકાનેર તાલુકા પોલીસ સ્ટેશન ખાતે હત્યાની ફરિયાદ નોંધાવેલ છે જેમાં જણાવ્યુ છે કે, વાંકાનેર તાલુકાના ઢુવા માટેલ રોડ ઉપર આવેલ ખોડીયાર ચેમ્બરની દુકાન નંબર 12 માં કોઈ અજાણ્યા શખ્સ દ્વારા બોથડ પદાર્થના ઘા માથાના ભાગે મારીને યુવાનની હત્યા કરવામાં આવી હતી. જેથી આ બનાવની તાલુકા પોલીસને જાણ કરતાં ઇન્ચાર્જ પીઆઇ હકૂમતસિંહ જાડેજા સહિતની ટિમ સ્થળ ઉપર પહોચી હતી અને મૃતક યુવાનની ઓળખ મેળવવા માટે તજવીજ શરૂ કરી હતી અને મૃતક યુવાનનું નામ ઉત્તમ વિકાસ સાહુ હોવાનું સામે આવ્યું છે અને તે રોસા ટાઇલ્સ કારખાનામાં કિલનનો કોન્ટ્રાકટર ચલાવતો હતો અને તેને દુકાન ભાડે રાખી હતી જેમાં તે રહેતો હતો. જો કે, આ યુવાનની તેને ભાડે રાખેલ દુકાનમાં કોણે અને શા માટે હત્યા કરી છે તે દિશામાં આગળની તપાસ પોલીસે હાથ ધરી છે.