ભારે કરી: મોરબી નજીક કારખાનના કવાર્ટરમાં મહિલાનું અને સાથે રહેતા યુવાનનું તાલુકા પોલીસ સ્ટેશન ખાતે મોત

મોરબીના લખધીરપુર રોડ ઉપર આવેલ સીરામીક કારખાનાના લેબર કવાર્ટરમાં રહેતા અને મજૂરી કામ કરતા યુવાનની સાથે તેના લેબર કવાર્ટરમાં રહેતી મહિલાનું મોત નીપજયું હતું જેથી તેના મૃતદેહને પીએમ માટે મોરબીની સિવિલે લઈને આવ્યા હતા અને આ મૃતક મહિલાના શરીર ઉપર મારના નિશાન જોવા મળી રહ્યા હોવાનું પોલીસ પાસેથી જાણવા મળે છે. અને મૃતક મહિલાના મૃતદેહનું ફોરેન્સિક પીએમ મોરબીની સરકારી હોસ્પિટલ ખાતે કરવામાં આવી રહ્યું છે જો કે, મૃતક મહિલાની સાથે રહેતા યુવાનને મોરબી તાલુકા પોલીસ સ્ટેશન ખાતે બેસાડવામાં આવ્યો હતો દરમિયાન તે યુવાનનું પણ કોઈ કારણસર મોત નીપજયું હતું જેથી તેના મૃતદેહને પણ મોરબી સિવિલ હોસ્પિટલ ખાતે લઈને આવ્યા છે આમ આ બનાવની પોલીસે પ્રાથમિક નોંધ કરીને સમગ્ર ઘટનાના મૂળ સુધી પહોંચવા માટેની તજવીજ હાથ ધરી છે.

મોરબી તાલુકાના લખધીરપુર ગામ પાસે આવેલ લેક્સસ સિરામિક કારખાના લેબર કવાર્ટરમાં રહેતા અને મજૂરી કામ કરતા નરેન્દ્રસિંહ કમલસિંગ ધુરવાની સાથે તેના કવાર્ટરમાં રહેતા પુષ્પાદેવી ગંભીરસિંહ મરાવી (20) નામની મહિલાનું મોત નીપજયું હતું જેથી તેના મૃતદેહને પીએમ માટે મોરબીની સરકારી હોસ્પિટલ ખાતે લઈને આવ્યા હતા અને તેની સાથે રહેતા નરેન્દ્રસિંહ કમલસિંગ ધુરવા (25) નામના યુવાનને મોરબી તાલુકા પોલીસ સ્ટેશન ખાતે પૂછપરછ માટે લાવ્યા હતા દરમ્યાન કોઈ કારણોસર નરેન્દ્રસિંહ ધુરવાનું પણ મોત નીપજ્યું હતું જેથી તેના મૃતદેહને પણ મોરબી તાલુકા પોલીસ સ્ટેશન ખાતેથી પીએમ માટે મોરબીની સરકારી હોસ્પિટલ ખાતે લઈને આવ્યા હતા અને આ બનાવની મોરબી સિટી બી ડિવિઝન પોલીસ સ્ટેશન ખાતે નોંધ કરીને પોલીસે આગળની રાબેતા મુજબની કાર્યવાહી હાથ ધરી હતી. વધુમાં આ બનાવ સંદર્ભે ડીવાયએસપી વિરલ દલવાડી સાથે વાત કરતા તેમણે જણાવ્યું હતું કે બંને મૃતક વ્યક્તિના મૃતદેહનું ફોરેન્સિક પીએમ કરાવવામાં આવી રહ્યું છે અને મૃતક મહિલાના શરીર ઉપર મારના નિશાનો જોવા મળી રહ્યા છે જોકે, મહિલાનું મોત કઈ રીતે થયું હતું અને યુવાનનું મોત ક્યા કારણોસર થયું છે તેનું ચોક્કસ કારણ જાણવા માટે થઈને હાલમાં ફોરેન્સિક પીએમ કરવામાં આવી રહ્યું છે ત્યાર બાદ આ ઘટના વિષે સ્પષ્ટતા થાય તેવું હાલમાં ચર્ચાઇ રહ્યું છે