ટંકારાના રોહીશાળા ગામે ખેડૂતોના ખેતરોમાંથી કેબલ વાયરોની ચોરી

ટંકારાના રોહીશાળા ગામના સિમ વિસ્તારમાં તસ્કરોએ ધામા નાખ્યા હતા અને રોહીશાળાથી વિરવાવ તરફ જવાના રસ્તા ઉપર આવેલ ખેતરોથી કેબલ વાયરોની ચોરી કરવામાં આવેલ છે અને ખેડૂતોએ ખેતરમાં કૂવામાંથી સિંચાઇ માટેનું પાણી મેળવવા માટે રાખેલી મોટરના કેબલ વાયરની ચોરી કરવામાં આવતા ખેડૂતોમાં રોષની લાગણી જોવા મળી રહી છે.

હાલમાં રોહીશાળા ગામના લોકો પાસેથી મળતી માહિતિ મુજબ વિરવાવ રોડ ઉપર આવેલા ખેતરોમાં ખેડૂતોએ સિંચાઇ માટે ખેતરોમાં મોટર સાથે જે કેબલ વાયર રાખેલા હોય છે તે વાયરની ચોરી કરવામાં આવેલ છે અને એક કે બે નહીં પરંતુ ચારથી વધુ ખેડૂતોના ખેતરોમાંથી વાયરની ચોરી કરવામાં આવેલ છે જેમાં દેવશીભાઈ સવસાણી, શાંતિલાલ ટાંક, મનસુખભાઈ ચોટલિયા વિગેરેનો સમાવેશ થાય છે. વધુમાં ગામના લોકો પાસેથી મળતી માહિતિ મુજબ એક જ રાતમાં ખેડૂતોના ખેતરમાં રહેલા કૂવામાંથી સીંચાઈનું પાણી મેળવવા માટે મૂકેલી મોટરના કેબલ વાયરની ચોરી કરવામાં આવેલ છે. જેથી ખેડૂતોની મુશ્કેલીમાં વધારો થયો છે અને તેઓને આર્થિક  નુકશાન પણ થયું છે. આ બનાવની ગામના લોકો દ્વારા પોલીસને જાણ કરવામાં આવી છે જેથી પોલીસે ખેડૂતોના ખેતરમાંથી કેબલ વાયરની ચોરી કરનારા શખ્સોને દબોચી લેવા જુદીજુદી દિશામાં તપાસ શરૂ કરી છે.