બિગ ન્યૂઝ: મોરબીના નિખિલ હત્યા કેસમાં સીબીઆઇએ નવેસરથી FIR દાખલ કરી, DYSP અક્ષય વશિષ્ઠને તપાસ સોંપાઈ

મોરબીમાં અકુદરતી સેક્સનો ભોગ બનાવ્યા બાદ એક સગીર છોકરાની કમકમાટીભરી હત્યાના કેસમાં નવ વર્ષનાં લાંબા સમય સુધી સ્થાનિક પોલીસથી લઇ સ્પેશ્યલ ઇન્વેસ્ટીગેશન ટીમ પણ ગુનાનો ભેદ ઉકેલી નહી શકતાં કે શકમંદોને શોધી નહી શકતાં સીબીઆઈને સોંપવાનો હાઇકોર્ટ દ્વારા આદેશ કરવામાં આવ્યો હતો. જેને પગલે સીબીઆઇ દ્વારા તાત્કાલિક અસરથી સગીરના હત્યા કેસમાં નવેસરથી એફઆઇઆર દાખલ કરવામાં આવી હતી અને કેસની તપાસ સીબીઆઇના ડીવાયએસપી અક્ષય વશિષ્ઠને સોંપવામાં આવી છે. 

આટલા લાંબા સમય સુધી કેસની તપાસમાં કોઈ પરિણામ નહિ આવતા પોલીસ અને તપાસનીશ એજન્સીની ટીકા કરી ગુજરાત હાઇકોર્ટના જસ્ટિસ હસમુખ ડી.સુથારે સમગ્ર કેસની તપાસ સીબીઆઇને સોંપવાનો હુકમ કર્યો હતો. આ કેસની વિગતો મુજબ પોતાના સગીર પુત્રને ગુમાવનાર મોરબી ખાતે રહેતા અરજદાર પિતા દ્વારા હાઇકોર્ટમાં કરાયેલી રિટ અરજીમાં આક્ષેપ કરતાં જણાવાયું હતું કે, ગત તા.૧૫/૧૨/૨૦૧૫ના રોજ તેમનો સગીર પુત્ર શાળાએથી ઘેર નહી આવતાં તેમણે શાળાએ જઇ ટ્રસ્ટીને પૂછતાં ટ્રસ્ટીએ જણાવ્યું કે, બધા છોકરાઓ તો રાબેતા મુજબના ટાઇમે સ્કૂલેથી છૂટી ગયા છે અને જતા રહ્યા છે. જેથી અરજદાર પિતાએ તેમના પુત્રના મિત્રને પૂછતાં તેણે જણાવ્યુ કે, તેઓ બધા તો ૧૨:૧૫ વાગ્યે જ છૂટી ગયા હતા. એ પછી તેમના સગાવ્હાલા, પરિચિતો અને મિત્ર વર્તુળમાં ભારે તપાસ કરવા છતાં પુત્રની કોઇ ભાળ મળી ન હતી. બાદમાં પિતાને તેની સાયકલ એક પાનના ગલ્લા પાસેથી મળી હતી.

ત્યાર બાદ અરજદારનો પુત્ર એકટીવા કે મોટરસાયકલ પર બેસીને કોઇકની સાથે જતો હતો. કોઇ જ રીતે સગીર પુત્રની ભાળ નહી મળતાં આખરે અરજદાર પિતાએ મોરબી શહેરના એ ડિવીઝન પોલીસ મથકમાં ફરિયાદ નોંધાવી હતી. ત્રણ દિવસ પછી તા.૧૮/૧૨/૨૦૧૫ના રોજ મચ્છુ ડેમ પાસેથી તેમના માસૂમ પુત્રની લાશ મળી હતી. પોસ્ટમોર્ટમ રિપોર્ટમાં ચોંકાવનારો ખુલાસો સામે આવ્યો હતો કે, તેમના પુત્ર સાથે અકુદરતી સેક્સ બાદ તેની કમકમાટીભરી હત્યા કરી દેવાઇ હતી. જેને પગલે પોલીસે કલમ-૩૦૨ અને ૩૭૭નો પણ ઉમેરો કર્યો હતો. અરજદાર પિતાએ તેમનો પુત્ર સ્થાનિક સ્વામિનારાયણ મંદિરમાં પૂજા-દર્શન માટે જતો હોઇ સ્વામિનારાયણ મંદિરના મહંત પરત્વે ગંભીર આશંકા વ્યકત કરી હતી. પરંતુ પોલીસે તે દિશામાં કોઇ તપાસ જ કરી ન હતી અને અરજદારને તપાસમાં કોઇ ન્યાય મળ્યો ન હતો. 

દરમ્યાન આ કેસમાં તા.૨૭/૯/૨૦૧૭ ના રોજ સ્પેશ્યલ ઇન્વેસ્ટીગેશન ટીમ(સીટ)ની પણ રચના કરવામાં આવી હતી પરંતુ આજદિન સુધી સીટની તપાસમાં પણ કોઇ જ ફળશ્રુતિ કે પરિણામ મળ્યા ન હતા. જેથી હાઇકોર્ટે સીઆઇડી ક્રાઇમના તપાસનીશ અધિકારી કે.કે.જાડેજાનો તપાસ અહેવાલ મંગાવ્યો હતો. જેમાં પણ એ જ સ્ટોરી રિપીટ કરાઇ હતી કે, સમગ્ર ગુનામાં કોઇ શકમંદ કે, કડી મળી આવતા નથી. જેથી હાઇકોર્ટે આ બાબતની ખૂબ જ ગંભીર નોંધ લઇ તપાસનીશ એજન્સીઓની નિષ્ફળતાને લઇ આલોચના કરી હતી અને આખરે સમગ્ર કેસની તપાસ સીબીઆઇને સોંપી દેવાનો હુકમ કર્યો હતો. અને હાઇકોર્ટના હુકમને પગલે સીબીઆઇ મુબઇના ડીઆઇજી સાયલી ધુરાતે સમગ્ર કેસમાં નવેસરથી સીબીઆઇ તરફથી એફઆઇઆર દાખલ કરી કેસની તપાસ સીબીઆઇના ડીવાયએસપી અક્ષય વશિષ્ઠને સોંપવાનો હુકમ કર્યો છે.