મોરબીના બગીચાઓમા રમત ગમતના સાધનો-બાકડા મૂકવા કોંગ્રેસની પાલિકામાં રજુઆત

મોરબી એ ગ્રેડની પાલિકા છે તો પણ આજની તારીખે એક પણ સારો બગીચો મોરબીમાં રહ્યો નથી અને લોકોને હરવા ફરવા કે બેસવા માટેની કોઈ જગ્યા રહી નથી ત્યારે જે વર્ષો જૂના બાગ બગીચા છે ત્યારે બાંકડા મૂકવામાં આવેલ નથી. જેથી મોરબી શહેર કોંગ્રેસ સમિતિના મંત્રી દ્વારા સરદારબાગ, સુરજબાગ તેમજ મહાત્મા ગાંધી બાગમાં બાકડા અને બાળકો માટે રમત ગમતના સાધનો મુકવામાં આવે તેવી ચીફ ઓફિસરને રજુઆત કરવામાં આવી છે.

હાલમાં કોંગ્રેસનાં મંત્રી સૂરપાલસિંહ જાડેજાએ કરેલ રજૂઆતમાં જણાવ્યુ છે કે, મોરબીમાં એક સમયે સરદારબાગ, સુરજબાગ તેમજ મહાત્મા ગાંધી બાગ લોકો માટે આનંદ પ્રમોદ માટેના ઉત્તમ સ્થાન હતા જો કે, હાલમાં તેની સ્થિતિ અતિદયનીય છે આ ત્રણેય બગીચામાં આજની તારીખે લોકોને બેસવા માટેના બાકડા તેમજ બાળકોને રમવા માટેનો કોઈ સાધનો નથી અને વર્ષો પહેલા જે મૂકવામાં આવેલ હતા તે હીંચકા સહિતના સાધનો તૂટી ગયેલ છે અને બાળકોને નુકશાન કરે તેવી સ્થિતિમાં છે તો પણ તેને રીપેર કરવા માટેની દરકાર કયારે પણ પાલિકાએ લીધેલ નથી જેથી કરીને આ ત્રણેય બગીચામાં હીંચકા સહિતના સાધનો અને લોકોને બેસવા માટેના બાકડા મૂકવામાં આવે તેવી માંગ કરેલ છે અને જો કે, બાગ બગીચાની કાયાપલટ કયારે કરવામાં આવશે તે તો આગામી સમય જ બતાવશે.