માટીની આડમાં દારૂની હેરફેરી: માળીયા (મિં)ની ભીમસર ચોકડી પાસેથી 156 બોટલ દારૂ ભરેલ ટ્રક ટ્રેલર સાથે બે ઝડપાયા, માલ મોકલાવનારની શોધખોળ

માળીયા (મિં)ની ભીમસર ચોકડી નજીક હાઇવે રોડ ઉપરથી ટ્રક ટ્રેલર પસાર થઈ રહ્યું હતું અને તેમાં માટી ભરેલ હતી જો કે, તેને રોકીને ચેક કરવામાં આવતા માટીની આડમાં દારૂની જુદીજુદી બ્રાન્ડની બોટલોની હેરફેરી કરવામાં આવતી હોવાનું સામે આવ્યું હતું જેથી કરીને પોલીસે દારૂની 156 બોટલ તેમજ વાહન મળીને 21,62,660 નો મુદામાલ કબજે કરીને બે શખ્સની ધરપકડ કરેલ છે. અને માળીયા તાલુકા પોલીસ સ્ટેશન ખાતે માલ મોકલાવનાર સહિત ત્રણ શખ્સોની સામે ગુનો નોંધાયેલ છે.

મોરબી જિલ્લા એલસીબીના પીઆઇ એમ.પી.પંડયાની સુચના મુજબ પીએસઆઈ બી.ડી.ભટ્ટ તેમજ સ્ટાફના માણસો કામ કરી રહ્યા છે તેવામાં જિજ્ઞાશાબેન કણસાગરા અને સુરેશભાઇ હુંબલને ખાનગી રાહે હકિકત મળેલ હતી કે, સામખીયાળી તરફથી ટ્રક ટ્રેલર નં. આરજે 32 જીડી 2544 આવેલ છે તેમાં પાછળના ભાગે તાલપત્રી બાંધેલ છે આ ટ્રક ટ્રેલરમાં ઇંગ્લીશ દારૂનો જથ્થો ભરેલ છે. જેથી એલસીબીની ટિમ પેટ્રોલીંગમાં હતી ત્યારે માળીયા (મિં) ના ભીમસર ચોકડી નજીકથી આ બાતમી વાળો ટ્રક ટ્રેલર પસાર થતાં તેને ઓવરબ્રીજના સર્વીસ રોડ પાસે રોકવામાં આવેલ હતો અને ચેક કરવામાં આવ્યો હતો ત્યારે ટ્રક ટ્રેલરમાં ભરેલ માટીની આડમાં દારૂની અલગ-અલગ બ્રાંડની બોટલોની હેરફેરી કરવામાં આવી રહી હોવાનું સામે આવ્યું હતું.

હાલમાં પોલીસે દારૂની 156 બોટલ જેની કિંમત 1,62,660 તેમજ 20 લાખનું વાહન આમ કુલ મળીને 21,62,660 નો મુદામાલ કબજે કર્યો છે અને આરોપીમાં ટ્રક ટ્રેલરના ડ્રાઇવર સોહનસિંગ નંદુસિંગ રાવત રહે. દેવરી મસુદા રોડ તાલુકો મસુદા જીલ્લા બ્યાવર અને ક્લીનર જસવંતસિંગ નેપાલસિંગ રાવત રહે. ન્યા ગામ સારોટ તાલુકો ભીમ જીલ્લો બ્યાવર વાળની ધરપકડ કરેલ છે અને આ દારૂનો જથ્થો ટ્રકમાં ભરીને માલ મોકલનાર તરીકે ઓમસિંગ ઉર્ફે ઓમ પ્રકાશ રાવત રહે. બ્યાવર રાજસ્થાન વાળાનું નામ સામે આવેલ છે જેથી કરીને માળીયા (મિં) પોલીસ સ્ટેશન ખાતે ત્રણ શખ્સોની સામે ગુનો નોંધવામાં આવેલ છે અને માલ મોકલાવનાર આરોપીને પકડવા માટે ચક્રોગતિમાન કરેલ છે.