મોરબીની પાનેલી જીઆઇડીસીમાં બોલેરોના ચાલકે હડફેટે લેતા 11 મહિનાના બાળકનું મોત

મોરબીના પાનેલી ગામ નજીક આવેલ જીઆઇડીસીમાં પાણીના ટાંકા પાસે બોલેરો ગાડીના ચાલકે બેફિકરાઈથી પોતાનું વાહન ચલાવ્યું હતું ત્યારે ત્યાં રમતો 11 મહિનાનો બાળક બોલેરો ગાડી નીચે આવી ગયો હતો જેથી તેને માથાના ભાગે ગંભીર ઈજા થઈ હોવાથી તે બાળકનું મોત નીપજયું હતું જે બનાવમાં મૃતક બાળકના પિતાએ બોલેરો ગાડીના ચાલક સામે ફરિયાદ નોંધાવતા પોલીસે ગુનો નોંધીને આગળની કાર્યવાહી હાથ ધરી છે.

જાણવા મળતી માહિતી મુજબ મૂળ મધ્યપ્રદેશના રહેવાસી અને હાલમાં મોરબીના ખાટકીપરાના નાકા પાસે મૈયાભાઈ ભરવાડના મકાનમાં ભાડે રહેતા અનિલભાઈ ભૂરાભાઈ કટારા (24) નામના યુવાને બોલેરો પીક અપ ગાડી નંબર જીજે 36 એક્સ 5031 ના ચાલક સામે મોરબી તાલુકા પોલીસ સ્ટેશન ખાતે ફરિયાદ નોંધાવી છે જેમાં તેને જણાવ્યુ છે કે, મોરબીના પાનેલી રોડ ઉપર આવેલ જીઆઇડીસીમાં પાણીના ટાંકા પાસે તેઓનો 11 મહિનાનો દીકરો આશિષ રમતો હતો તે દરમિયાન આરોપીએ પોતાના હવાલા વાળી બોલેરો પીકઅપ ગાડી બેફિકરાઈથી ચલાવી હતી અને બાળકને હડફેટે લેતા તે બાળકને માથાના ભાગે ગંભીર ઇજા થઈ હોવાથી બાળકનું મોત નીપજ્યું હતું જે બનાવ સંદર્ભે હાલમાં મૃતક બાળકના પિતાએ બોલેરો ગાડીના ચાલક સામે ફરિયાદ નોંધાવતા પોલીસે ગુનો નોંધી આરોપીને પકડવા માટે ચક્રોગતિમાન કર્યા છે

એક બોટલ દારૂ

માળીયા મીયાણા તાલુકાના વવાણિયા ગામે સ્મશાન પાસેથી પસાર થઈ રહેલ શખ્સને રોકીને પોલીસે ચેક કરતા તેની પાસેથી દારૂની એક બોટલ મળી આવી હતી જેથી પોલીસે 561 ની કિંમતની દારૂની બોટલ સાથે કિશનભાઇ આયદાનભાઇ ખાદા (30) રહે. વવાણીયા તાલુકો માળીયા મીયાણા વાળાની ધરપકડ કરી હતી અને તેની સામે ગુનો નોંધી આગળની કાર્યવાહી હાથ ધરી છે.