વાંકાનેર નજીક કાર ચાલકે સ્કૂટરને હડફેટે લેતા ઇજા પામેલ બે યુવાન સારવારમાં

વાંકાનેર ચોટીલા હાઈવે રોડ ઉપર નૂર પ્લાઝા સામે સ્કૂટરને કાર ચાલકે હડફેટે લેતા બે વ્યક્તિઓને ગંભીર ઇજા થયેલ હતી જેથી તેને સારવાર માટે હોસ્પિટલમાં લઈને આવ્યા હતા અને આ બનાવ સંદર્ભે ઈજા પામેલ યુવાને કાર ચાલક સામે વાંકાનેર સિટી પોલીસ સ્ટેશન ખાતે ફરિયાદ નોંધાવતા પોલીસે ગુનો નોંધી આરોપીને પકડવા માટે તજવીજ શરૂ કરેલ છે.

વાંકાનેર તાલુકાના કેરાળા ગામે રહેતા ગુલામહુસેનભાઇ મહમદભાઈ કડીવાર (45)એ કાર નંબર જીજે 12 આઈસી 0529 ના ચાલક સામે વાંકાનેર સિટી પોલીસ સ્ટેશન ખાતે ફરિયાદ નોંધાવેલ છે જેમાં જણાવ્યું છે કે વાંકાનેર ચોટીલા હાઈવે રોડ ઉપર આવેલ નૂર પ્લાઝા સામેથી ફરિયાદી તેઓની પાડોશમાં રહેતા ગુલામમોઈનભાઈ નૂરમામદભાઈના જ્યુપિટર નંબર જીજે 36 એમ 4085 માં ગુલામમોઇનભાઈને વાંકાનેર ખાતે વસ્તુ લેવી હોય બંને કેરાળાથી વાંકાનેર તરફ જઈ રહ્યા હતા અને ગુલામમોઇનભાઈ તેનું સ્કૂટર ચલાવી રહ્યા હતા દરમિયાન કાર ચાલકે સ્કૂટરને હડફેટે લેતા અકસ્માતનો બનાવ બન્યો હતો અને અકસ્માતના આ બનાવમાં ફરિયાદીને બંને પગના ઢીંચણ, બંને હાથમાં, જમણા હાથના અંગૂઠામાં, આંગળીઓમાં અને માથાના ભાગે ઇજાઓ થઈ હતી તથા સ્કૂટર ચલાવી રહેલા ગુલામમોઇનભાઈને માથાના ભાગે અને કમરના ભાગે ફ્રેકચર જેવી ગંભીર ઇજા થયેલ છે જેથી તેઓને સારવાર માટે લઈ ગયા હતા અને અકસ્માત સર્જીને પોતાના હવાલા વાળી કાર લઈને આરોપી સ્થળ ઉપરથી નાશી ગયેલ હોય આ બનાવ સંદર્ભે ઇજાગ્રસ્ત ગુલામહુસેનભાઈ કડીવાર દ્વારા નોંધાવવામાં આવેલ ફરિયાદ આધારે પોલીસે ગુનો નોંધીને આરોપીને પકડવા માટે તજવીજ શરૂ કરેલ છે