હળવદમાં અગાઉ થયેલ માથાકૂટનું મનદુખ રાખીને યુવાનને ત્રણ શખ્સોએ પાઇપ-ઢીકાપાટુનો મારમાર્યો

હળવદમાં રહેતા યુવાનના પિતા સાથે અગાઉ થયેલ માથાકૂટનું મનદુખ રાખીને ત્રણ શખ્સો દ્વારા યુવાનને રસ્તામાં રોકીને ગાળો આપવામાં આવી હતી તથા લોખંડના પાઇપ તથા ઢીકાપાટુ વડે તેને માર મારવામાં આવ્યો હતો જેથી યુવાને સારવાર લીધા બાદ નોંધાવેલ ફરિયાદ આધારે પોલીસે ત્રણ શખ્સોની સામે ગુનો નોંધી આરોપીને પકડવા માટે તજવીજ શરૂ કરેલ છે

હળવદમાં બસ સ્ટેન્ડની પાછળના ભાગમાં રહેતા પ્રકાશભાઈ મગનભાઈ પરમાર (35)એ હાલમાં જયેશભાઈ કાળુભાઈ પરમાર, મોહિત પરમાર અને અમન પરમાર રહે. ત્રણેય બસ સ્ટેશન પાછળ હળવદ વાળાની સામે ફરિયાદ નોંધાવી છે જેમાં જણાવ્યુ છે કે, તેઓના પિતાને અગાઉ તેના ભાઈ સાથે માથાકૂટ થયેલ હતી જે બાબતનું મનદુખ રાખીને ફરિયાદી જ્યારે સખી ફ્લોર મિલ પાસેથી પસાર થઈ રહ્યો હતો ત્યારે તેની સાથે જયેશભાઈ કાળુભાઈ પરમારે બોલાચાલી અને જપાજપી કરી હતી અને ગાળો આપીને લોખંડના પાઇપ વડે માથામાં મારમાર્યો હતો તથા મોહિત અને અમને ગાળો આપીને મારમારીને ઇજા કરી હતી જેથી કરીને ઇજા પામેલા યુવાનને સારવાર માટે હોસ્પિટલે લઈ ગયા હતા અને ત્યારબાદ યુવાને નોંધાવેલ ફરિયાદ આધારે પોલીસે ગુનો નોંધીને આરોપીને પકડવા માટે તજવીજ શરૂ કરેલ છે

બાઇક સ્લીપ થતાં ઇજા

મોરબી તાલુકાના ગોર ખીજડીયા ગામે રહેતો અજય આંબાભાઈ નકુમ (25) નામનો યુવાન નવલખી રોડ ઉપર પરશુરામ ધામ નજીકથી બાઈક લઈને પસાર થતો હતો ત્યારે બાઇક સ્લીપ થવાના કારણે અકસ્માત થયો હતો જે બનાવમાં ઇજા પામેલા યુવાનને સારવાર માટે હોસ્પિટલે લઈને આવ્યા હતા અને આ બનાવની પોલીસને જાણ કરવામાં આવી હતી

ઝેરી દવા પીધી

મોરબીના લીલાપર ગામે રહેતા પ્રશાંત ખીમજીભાઈ ડાભી (21) નામનો યુવાને કોઈ અગમ્ય કારણોસર ઝેરી દવા પી લેતા તેને સારવાર માટે મોરબીના શનાળા રોડ ઉપર આવેલ ક્રિષ્ના હોસ્પિટલ ખાતે લઈને આવ્યા હતા અને ત્યાં તેને સારવાર આપ્યા બાદ આ બનાવની હોસ્પિટલ મારફતે મોરબી તાલુકા પોલીસને જાણ કરતા પોલીસે બનાવની નોંધ કરી આગળની કાર્યવાહી હાથ ધરી છે

આધેડને ઇજા થતાં સારવારમાં

મોરબીના ગાળા ગામ પાસે કે.ડી. માઇક્રોન ખાતે રહેતા અને કામ કરતા જયપ્રકાશ રામઅવધ મિશ્રા (52) નામના આધેડને કામગીરી દરમિયાન લોખંડની પ્લેટ વાગી જવાના કારણે ઈજા થઈ હતી જેથી તેને સારવાર માટે મોરબીની ખાનગી હોસ્પિટલમાં લઈને આવ્યા હતા અને ત્યારે તેને સારવાર આપીને આ બનાવની મોરબી તાલુકા પોલીસને જાણ કરી હતી.