ડોક્ટર સતિષભાઈ પટેલ દ્વારા અત્યાર સુધીમાં કુલ સાત પુસ્તકો લખવામાં આવ્યા છે અને આ તેમના આઠમા પુસ્તકના વિમોચન પ્રસંગે ડોક્ટર સતિષભાઈ પટેલ જણાવ્યું હતું કે હું લેખક છું અને પુસ્તકનું સર્જન કરવું એ મારો શોખ છે અને સાથે ડોક્ટર પણ છું તેથી મને વિચાર આવ્યો કે લેખક અને ડોક્ટરની સંવેદના ભેગી કરીને એક પુસ્તકનું સર્જન કેમ ન કરી શકાય ?  અને આ વિચારે મને "મેકિંગ એ ડોક્ટર" પુસ્તક લખવા માટે પ્રેરણા આપી અને આ પુસ્તકમાં સાહિત્ય અને મેડિકલ સાયન્સ બંનેનો સમાવેશ છે.મેડિકલમાં પ્રવેશ મેળવ્યા પછી સારા ડોક્ટર કેવી રીતે બની શકાય ? તેની વાત આ પુસ્તકની અંદર લેખક દ્વારા લખવામાં આવી છે આ તકે શહેરની જાણીતી ક્રિષ્ના હોષ્પીટલના ડો.વિનોદ કૈલા સહીતના જાણીતા તબીબો, શિક્ષકો, લેખકો, કવિઓ, શહેરના નામાંકિતો અને અગ્રણીઓ હાજર રહ્યા હતા અને તેઓની સાથે હાલની મોરબીની મેડિકલ કોલેજ કે જેમાં અભ્યાસ કરી રહેલા વિદ્યાર્થીઓ છે તેઓને પણ હાજર રાખવામાં આવ્યા હતા.જેથી કરીને તેઓને પણ આમાંથી કંઈક નવું શીખવા મળે.ડોક્ટર લાઇફ શું હોય ? ડોક્ટર કેવી રીતે બનાઇ ? ડોક્ટર બનવાથી કેવા કેવા પ્રકારની જવાબદારીઓ ભવિષ્યમાં નિભાવવાની થાય ? સાથે સાથે કેવી કાયદાકીય બાબતો પણ સામે આવી શકે ? તેનું પણ જ્ઞાન આ સેમિનારમાં આપવામાં આવ્યું હતું.સાથે સાથે પુસ્તક વિમોચનના કાર્યક્રમમાં આ વિદ્યાર્થીઓને તબીબી વ્યવસાયના પ્રસ્થાપિત કરેલા જે ધોરણો છે તેની શપથ લેવડાવવામાં આવી હતી અને એક સારા ડોક્ટર બનીને સમાજની સેવા કરવાની સાથે સાથે કઈ રીતે સફળ થઈ શકાય તે બાબતની આમંત્રિત વક્તાઓ દ્વારા છણાવટ કરવામાં આવી હતી.આ પુસ્તકની અંદર ડોક્ટર અને લેખક સતિષભાઈ પટેલ દ્વારા પોતાના ગામ બગથળાથી નીકળેલા એક બાળક અને ત્યાંથી આ સફળ ડોક્ટર અને લેખક બનવા સુધીની સફરના દરમિયાન તેઓને મદદરૂપ બનનાર અને ચમત્કાર કહી શકાય તેવા બનાવો તેઓએ ટાંકિયા છે.જે ભાવિ ડોક્ટરો માટે ચોક્કસ સીમાચિન્હ બની રહેશે અને અવનવું જાણવા શીખવા અને સમજવા આ પુસ્તકની અંદરથી તેઓને મળશે તેવો ભાવ તેઓએ વ્યક્ત કર્યો હતો.તેમજ અગાઉના પુસ્તકોની જેમ જ આ પુસ્તકને પણ વાચકો તરફથી સારો સહકાર મળશે તેવી અપેક્ષા ડો.સતિશ પટેલે દર્શાવી હતી.