મોરબીના મકનસર પાસે બાઇક ચાલકે હડફેટે લેતા રોડ ક્રોસ કરી રહેલા યુવાનને માથામાં હેમરેજ

મોરબીના મકનસર પાસે નેશનલ હાઈવે રોડ ઉપર પગપાળા ચાલીને યુવાન રોડ ક્રોસ કરી રહ્યો હતો ત્યારે બાઇક ચાલકે તેને હડફેટે લેતા અકસ્માત થયો હતો જે બનાવમાં યુવાનને માથામાં હેમરેજ જેવી ઇજા થઈ હતી જેથી તેને સારવારમાં લઈ ગયા હતા અને આ બનાવ સંદર્ભે હાલમાં મોરબી તાલુકા પોલીસ સ્ટેશને ગુનો નોંધાયેલ છે.

મોરબીના નવા મકનસર ગામે પાણીના ટાંકાની બાજુમાં રહેતા મેપાભાઇ વિશાભાઈ વેરાણા (43) નામના યુવાને બાઈક નંબર જીજે 36 એએમ 7054 ના ચાલક સામે ફરિયાદ નોંધાવેલ છે જેમાં જણાવ્યુ છેકે, મકનસર પાસે આવેલ ચામુંડા પ્લાઝા નજીક નેશનલ હાઈવે રોડ ઉપરથી તે પગપાળા ચાલીને પસાર થઈને રોડ ક્રોસ કરી રહ્યો હતો ત્યારે બાઇક ચાલકે તેને હડફેટે લેતા અકસ્માત થયો હતો જે બનાવમાં ફરિયાદીને માથામાં હેમરેજ જેવી ઇજા થઈ હતી જેથી તેને સારવાર માટે હોસ્પિટલે લઈ ગયા હતા અને ત્યારબાદ આ બનાવમાં ઇજા પામેલા યુવાને નોંધાવેલ ફરિયાદ આધારે પોલીસે ગુનો નોંધી આરોપીને પકડવા માટે તજવીજ શરૂ કરેલ છે.

સાપ કરડી ગયો

મોરબી તાલુકાના આમરણ ગામે વાડી વિસ્તારમાં હરિરામ રવજીભાઈ ચૌહાણ (45) નામના યુવાનને સાપ કરડી ગયો હતો જેથી તેને તાત્કાલિક સારવાર માટે મોરબીની સિવિલ હોસ્પિટલ ખાતે લઈને આવ્યા હતા ત્યાં તેને સારવાર આપીને આ બનાવની પોલીસને જાણ કરવામાં આવી હતી.

અકસ્માતમાં ઇજા

મોરબીના ઊંચી માંડલ ગામ પાસે રહેતા સમુનાથ રામચંદ્રનાથ (40) નામના યુવાનને ગામમાં આવેલ બાપાસીતારામ હોટલ પાસે વાહન અકસ્માતના બનાવમાં ઈજા થઇ હતી જેથી તેને સારવાર માટે હોસ્પિટલે લઈને આવ્યા હતા અને ત્યાં તેને સારવાર આપીને આ બનાવની પોલીસને જાણ કરવામાં આવી હતી.