મોરબીમાં બંધ પડેલ કંપનીમાં ભાગીદાર બનાવવાનું કહીને યુવાનની સાથે 1.19 કરોડથી વધુની છેતરપિંડી

મોરબીના જુના ઘુટુ રોડ ઉપર આવેલ યેશા ટાઈલ્સ પ્રા.લી. નામનું કારખાનું બંધ પડી ગયેલ હોય તે કારખાનું ચાલુ કરવા માટે થઈને રૂપિયાની જરૂર હતી જેથી યુવાનને કંપનીમાં ભાગીદાર બનાવવાની વાત કરીને તેની પાસેથી ઓનલાઈન તથા રોકડા આમ કુલ મળીને 33.50 લાખ રૂપિયા લેવામાં આવ્યા હતા અને ત્યારબાદ કંપની બંધ થઈ જતા કંપની વાળી જગ્યાએ પ્લોટ કરીને તેમાંથી યુવાનને પ્લોટ આપવા માટે કહ્યું હતું આમ યુવાનના રૂપિયા તથા તેના સગા વાલા પાસેથી ઉછી ઉધાર લઈને રોકડા આપેલા રૂપિયા મળીને 1,19,55,708 રૂપિયા આરોપીએ લઈ લીધા હતા અને યુવાનને સોદાખત કરી આપી પ્લોટ બીજાને વેચાણ કરી દીધા છે અને યુવાનને દસ્તાવેજ કરી આપવામાં આવેલ નથી જેથી યુવાને વિશ્વાસઘાત અને છેતરપિંડીની હાલમાં ફરિયાદ કરી છે જેના આધારે પોલીસે ગુનો નોંધી આરોપીને પકડવા માટે તજવીજ શરૂ કરી છે

મોરબી નજીકના રવાપર ગામે કેપિટલ માર્કેટની સામેના ભાગમાં આવેલ ગોલ્ડન પેલેસ એપાર્ટમેન્ટના ફ્લેટ નંબર 601 માં રહેતા જયેન્દ્રભાઈ અમૃતલાલ દલસાણીયા (43) એ હાલમાં યેશા ટાઈલ્સ પ્રા.લી.ના ડાયરેક્ટર રાજેન્દ્રકુમાર ચતુરભાઈ હાલપરા રહે.502 ભગવતી ટીવીન્સ-બી સાનિધ્ય પાર્ક સોસાયટી રવાપર મોરબી વાળા સામે મોરબી તાલુકા પોલીસ સ્ટેશન ખાતે ફરિયાદ નોંધાવેલ છે જેમાં જણાવ્યુ છે કે, આરોપીની યેશા ટાઈલ્સ પ્રા.લી. કંપની બંધ પડી ગઈ હતી જેને ચાલુ કરવા માટે થઈને આરોપીને રૂપિયાની જરૂર હોય જેથી ફરિયાદીને કંપનીના ભાગીદાર બનાવવાની વાત કરી વિશ્વાસમાં લઈને અલગ અલગ તારીખે કંપનીના ખાતામાં 18,50,000 ઓનલાઈન ટ્રાન્સફર કરાવ્યા હતા તેમજ 15 લાખ રૂપિયા રોકડા આરોપીના કહેવાથી દીપકભાઈ આહીરને આપેલા હતા અને બાદમાં કંપની બંધ થઈ જતા ફરિયાદી આરોપી પાસેથી પૈસા પરત માગતા આરોપીએ કંપનીવાળી જગ્યાએ પ્લોટ પાડીને ફરિયાદીને પ્લોટ આપવાની વાત કરી હતી અને ફરિયાદીએ અગાઉ આપેલા રૂપિયા 33.50 લાખ તથા તેઓના સગા વાલા પાસેથી ઉછીના ઉધાર લઈને રોકડા 86,05,708 આપ્યા હતા. આમ કુલ મળીને 1,19,55,708 આરોપીએ લઈને ફરિયાદીને પ્લોટનો સોદાખત કરી આપી પ્લોટ બીજાને વેચાણ કરી આપ્યા છે અને ફરિયાદી સાથે સોદાખત કરેલા પ્લોટનો દસ્તાવેજ કરી આપેલ નથી અને તેને રૂપિયા પણ પરત આપેલ નથી જેથી યુવાનની સાથે વિશ્વાસઘાત અને છેતરપિંડી કરેલ હોય હાલમાં ભોગ બનેલા યુવાને નોંધાવેલ ફરિયાદ આધારે પોલીસે ગુનો નોંધીને આરોપીને પકડવા માટે તજવીજ શરૂ કરેલ છે