વાંકાનેરમાં અગાઉ થયેલ બોલાચાલીનો ખાર રાખીને યુવાનને ત્રણ શખ્સોએ માર માર્યો

વાંકાનેરના આરોગ્યનગરમાં રહેતા યુવાનને તે વિસ્તારમાં રહેતા એક શખ્સ સાથે અગાઉ બોલાચાલી થઈ હતી જે બાબતનો ખાર રાખીને ત્રણ શખ્સો દ્વારા યુવાનની સાથે માથાકૂટ કરવામાં આવી હતી અને ઢિકાપાટુનો મારમાર્યો હતો તેમજ માથામાં ધોકો મારીને ઇજા કરી હતી જેથી ઇજા પામેલા યુવાનને સારવાર માટે હોસ્પિટલે લઈ ગયા હતા અને ત્યારબાદ આ બનાવ સંદર્ભે ભોગ બનેલ યુવાને 3 શખ્સોની સામે ફરિયાદ નોંધાવતા પોલીસે ગુનો નોંધી આરોપીઓને પકડવા માટે તજવીજ શરૂ કરી છે.

વાંકાનેરના આરોગ્ય નગરમાં રહેતા રફીકભાઈ ઉમરભાઈ સદવાણી (27)એ વાંકાનેર સિટી પોલીસ સ્ટેશન ખાતે જતીનભાઈ લાલજીભાઈ સાદરીયા, મેરૂભાઈ લાલજીભાઈ સાદરીયા અને દીપકભાઈ ગિરધરભાઈ સાદરીયા રહે. બધા આરોગ્યનગર વાંકાનેર વાળા સામે ફરિયાદ નોંધાવેલ છે જેમાં તેને જણાવ્યુ છે કે, આરોપી મેરૂભાઈ સાથે થયેલ અગાઉ બોલાચાલી થઈ હતી જેનો ખાર રાખીને ફરિયાદી જયારે વાંકાનેરમાં બસ સ્ટેશનના ગેટ પાસે હાજર હતો ત્યારે જતીનભાઈએ ગાળો આપીને માથામાં લાકડાનો ધોકો ફટકાર્યો હતો જ્યારે મેરૂભાઈએ ઢીકાપાટુનો મારમાર્યો હતો અને ઇજા કરી હતી તો દીપકભાઈએ ફરિયાદીને આ બાબતે કેસ કરીશ તો માર મારશું તેવી ધમકી આપી હતી જેથી ઈજા પામેલા યુવાને સારવાર લીધા બાદ હાલમાં વાંકાનેર સિટી પોલીસ સ્ટેશન ખાતે ફરિયાદ નોંધાવતા પોલીસે ત્રણ શખ્સોની સામે ગુનો નોંધીને આરોપીઓને પકડવા માટે તજવીજ શરૂ કરેલ છે.