વાંકાનેરના દીધલીયા ગામે ગંગોત્રી સ્ટોન ખાતે રિવર્સમાં આવેલ ડમ્પરના ચાલકે ખાટલા ઉપર સૂતેલા સગીરનું મોઢું ચિબી નાખતા મોત

વાંકાનેરના દીધલીયા ગામે આવેલ ગંગોત્રી સ્ટોન ખાતે સગીર ખાટલા ઉપર સૂતો હતો દરમિયાન ડમ્પર ચાલકે પાછળ જોયા વગર તેનું વાહન રિવર્સમાં લીધું હતું અને ખાટલા ઉપર સુતેલા સગીરને હડફેટે લઈને નીચે પાડી દીધો હતો જેથી તેને માથામાં ઇજા થઈ હતી અને તેનું મોઢું ચિબાઈ ગયું હતું જેથી સગીરનું મોત નીપજ્યું હતુ આ બનાવ સંદર્ભે મૃતક સગીરના પિતરાઈ ભાઈએ નોંધાવેલ ફરિયાદ આધારે પોલીસે ગુનો નોંધીને આરોપીને પકડવા માટે તજવીજ શરૂ કરેલ છે.

મૂળ દાહોદ જિલ્લાના રહેવાસી અને હાલમાં વાંકાનેર તાલુકાના દીધલીયા ગામે ગંગોત્રી સ્ટોન ખાતે રહેતા રાહુલ કાળુભાઈ મોહનિયા (22)એ ડમ્પર નંબર જીજે 13 એડબલ્યુ 7520 ના ચાલક સુનિલ જયપાલ રહે. હાલ ગંગોત્રી સ્ટોન દીધલીયા વાળાની સામે ફરિયાદ નોંધાવેલ છે જેમાં તેણે જણાવ્યું છે કે તેનો પિતરાઈ ભાઈ અશ્વિનભાઈ હીમતભાઇ મોહનિયા (16) રહે. મૂળ કાટું ગામ ધાનપુર તાલુકો જિલ્લો દાહોદ વાળાઓ તેઓની પાસે આવ્યો હતો અને ત્યાં ગંગોત્રી સ્ટોનમાં ખાટલા ઉપર સૂતો હતો દરમિયાન ડમ્પર ચાલકે ગફલત ભરી રીતે પોતાનું વાહન ચલાવ્યું હતું અને પાછળ જોયા વગર ડમ્પરને રિવર્સમાં લીધું હતું અને તે સમયે ખાટલા ઉપર સુતેલા ફરિયાદીના પિતરાઇ ભાઈને હડફેટે લઈને ખાટલા ઉપરથી નીચે પછાડી દીધો હતો જેથી તેને માથાના ભાગે ગંભીર ઈજા થઈ હતી અને તેનું મોઢું ચિબાઈ ગયું હતું જેથી સગીરનું મોત નીપજ્યું હતું આ બનાવ સંદર્ભે હાલમાં મૃતક સગીરના કૌટુંબિક ભાઈએ નોંધાવેલ ફરિયાદ આધારે પોલીસે ડમ્પર ચાલક સામે ગુનો નોંધીને આરોપીને પકડવા માટે તજવીજ શરૂ કરેલ છે.