હળવદના દેવળીયા ગામે સ્કૂલેથી છૂટીને ઘરે જતી પાંચ છોકરીઓને બુલેટ ચાલકે હડફેટે લેતા એકનું મોત, ત્રણને ઇજા: ગુનો નોંધાયો
SHARE
JOIN OUR GROUP
હળવદના દેવળીયા ગામે સ્કૂલેથી છૂટીને ઘરે જતી પાંચ છોકરીઓને બુલેટ ચાલકે હડફેટે લેતા એકનું મોત: ત્રણને ઇજા
હળવદ તાલુકાના જુના દેવળીયા ગામ થી ચરાડવા ગામ તરફ જવાના રસ્તા ઉપર આવેલ સંધિ વાસના નાકા પાસેથી સ્કૂલેથી છૂટેલી ચારથી પાંચ છોકરીઓ પોતાના ઘર તરફ જઈ રહી હતી દરમિયાન બુલેટ લઈને ત્યાંથી પસાર થઈ રહેલા શખ્સે તેનું બુલેટ બેફિકરાઈથી ચલાવ્યું હતું અને રોડ ઉપરથી પસાર થતી છોકરીઓને હડફેટ લીધી જે પૈકીની એક છોકરીને માથામાં ગંભીર ઇજા થઈ હોવાના કારણે તેનું મોત નિપજ્યું હતું જ્યારે ત્રણ દીકરીઓને ઈજા થઈ હોવાથી તેઓને સારવાર માટે હોસ્પિટલે લઈ ગયા હતા. આ બનાવ સંદર્ભે હાલમાં મૃતક બાળકીના પિતાની ફરિયાદ લઈને હળવદ તાલુકા પોલીસ સ્ટેશન ખાતે બુલેટના ચાલક સામે ગુનો નોંધીને પોલીસે આરોપીને પકડવા માટે તજવીજ શરૂ કરેલ છે.
હળવદ તાલુકાના જુના દેવળીયા ગામે ગોકુળીયા રોડ ઉપર રહેતા મનીષભાઈ કેશવજીભાઈ મોરવાડિયા (36) એ હળવદ તાલુકા પોલીસ સ્ટેશન ખાતે બુલેટ નંબર જીજે 36 એ 8000 ના ચાલક રામજીભાઈ ગોરધનભાઈ દેવીપુજક રહે. દેવળીયા વાળા ની સામે ફરિયાદ નોંધાવેલ છે જેમાં તેને જણાવ્યું છે કે ગત તા 24/6 ના રોજ સાંજના સાડા પાંચેક વાગ્યાના અરસામાં આરોપી તેનું બુલેટ લઈને તેના બુલેટમાં પાછળના ભાગે લખમણ ગોરધનભાઈ દેવીપુજક અને આકાશ પ્રકાશભાઈ દેવીપુજક ને બેસાડીને જૂના દેવળીયા થી ચરાડવા તરફ જવાના રસ્તા ઉપર પસાર થયો હતો અને ત્યારે તેણે બેદરકારીથી પોતાનું બુલેટ ચલાવીને રોડ સાઈડમાં સ્કૂલેથી ઘરે ચાલીને જતી છોકરીઓને લીધી હતી અને અકસ્માત સર્જ્યો હતો જે બનાવમાં ફરિયાદીની દીકરી રોશનીબેન ને માથાના ભાગે ગંભીર ઇજા થઈ હોવાથી તે બાળકીનું મોત નીપજ્યું હતું જ્યારે તેની સાથે રહેલ અન્ય ચાર જેટલી છોકરીઓમાંથી જાનવી સુરેશભાઈ, અંકિતા દિનેશભાઈ અને રીના મહેશભાઈ ને નાના મોટી ઇજાઓ થઈ હોવાથી તેઓને ઇજાગ્રસ્ત હાલતમાં સારવાર માટે હોસ્પિટલે ખસેડવામાં આવ્યા હતા અને અકસ્માતના બનાવ સંદર્ભે હાલમાં હળવદ તાલુકા પોલીસ સ્ટેશન ખાતે મૃતક બાળકીના પિતાએ નોંધાવેલ ફરિયાદ આધારે પોલીસે ગુનો નોંધીને આરોપીઓને પકડવા માટે તજવીજ શરૂ કરેલ છે.
