ભારે કરી: મોરબીના થોરાળા ગામે ગેસ એજન્સીના ગોડાઉનમાંથી ગેસના ભરેલા 30 બાટલાની ચોરી

સોના ચાંદી, ખાદ્ય વસ્તુઓ તેમજ રોકડા રૂપિયાની ચોરી થાય એવી ઘટનાઓ તો અનેક સામે આવી છે પરંતુ મોરબી તાલુકાના થોરાળા ગામ પાસે આવેલ ગેસ એજન્સીના ગોડાઉનને ખોલીને તેમાંથી ગેસના ભરેલા 30 બાટલાની ચોરી કરવામાં આવેલ છે જેથી 99 હજાર રૂપિયાની કિંમતના મુદ્દામાલની ચોરી થઈ હોવાની ગેસ એજન્સીના સંચાલક દ્વારા મોરબી તાલુકા પોલીસ સ્ટેશન ખાતે ફરિયાદ નોંધાવવામાં આવી છે

મૂળ મોરબી તાલુકાના થોરાળા ગામના રહેવાસી અને હાલમાં મોરબીમાં શનાળા રોડે આવેલ રામનગર સોસાયટી ખાતે રહેતા રજનીકાંતભાઈ લાલજીભાઈ મેરજા (56)એ અજાણ્યા શખ્સની સામે મોરબી તાલુકા પોલીસ સ્ટેશન ખાતે ફરિયાદ નોંધાવેલ છે જેમાં જણાવ્યુ છે કે, થોરાળા ગામની સીમમાં તેઓનું ફ્રીડમ ઇન્ડેન ગેસ એજન્સીનું ગોડાઉન આવેલ છે અને ગત તા. 27 ના રાત્રિના 8:00 વાગ્યાથી લઈને બીજા દિવસે સવારના 5:00 વાગ્યા સુધીના સમયગાળા દરમિયાન કોઈ અજાણ્યા શખ્સ દ્વારા તેઓના ગોડાઉનના દરવાજાને તોડવા માટેનો પ્રયાસ કરવામાં આવ્યો હતો અને દરવાજો નહીં તૂટતા દરવાજાને હુકમાંથી ખોલી ખસેડી નાખ્યો હતો અને ત્યારબાદ ગોડાઉનની અંદર પ્રવેશ કરીને ત્યાં રાખવામાં આવેલા ગેસના ભરેલા 30 બાટલા જેની કિંમત 99 હજાર રૂપિયા થાય છે તે ગેસના બાટલાઓની ચોરી કરવામાં આવેલ છે જેથી ગેસ એજન્સીના સંચાલક દ્વારા મોરબી તાલુકા પોલીસ સ્ટેશન ખાતે ફરિયાદ નોંધાવવામાં આવતા પોલીસે અજાણ્યા શખ્સની સામે ગુનો નોંધી આરોપીને પકડવા માટે તજવીજ શરૂ કરેલ છે.