મોરબીના રામપર ગામના પાટીયા પાસે ટ્રક ચાલકે બાઇકને હડફેટે લેતા ઇજા પામેલા યુવાનનું મોત

મોરબી માળિયા હાઇવે રોડ ઉપર આવેલ રામપર ગામના પાટીયા પાસેથી યુવાન બાઇક લઈને પસાર થઈ રહ્યો હતો ત્યારે તેના બાઈકને ટ્રકના ચાલકે હડફેટે લેતા અકસ્માત થયો હતો જે બનાવમાં યુવાનને શરીરે ઇજાઓ થઈ હોવાથી તેનુ મોત નીપજયું હતું અને અકસ્માત સર્જીને ટ્રક ચાલક પોતાનું વાહન મૂકીને નાસી ગયેલ હોય હાલમાં મૃતક યુવાનના ભાઈની ફરિયાદ લઈને પોલીસે ટ્રક ચાલક સામે ગુનો નોંધીને આગળની કાર્યવાહી હાથ ધરી છે

મૂળ બીલીયા ગામના રહેવાસી અને હાલમાં મોરબીના પીપળી ગામે આવેલ શિવ પાર્ક સોસાયટીમાં રહેતા મોહનભાઈ મોતીભાઈ બોસીયા (38)એ ટ્રક નંબર જીજે 36 વી 4360 ના ચાલક સામે મોરબી તાલુકા પોલીસ સ્ટેશન ખાતે ફરિયાદ નોંધાવી છે જેમાં જણાવ્યુ છે કે, મોરબી માળિયા હાઇવે રોડ ઉપર આવેલ રામપર ગામના પાટીયા પાસેથી તેઓના ભાઈ મનસુખભાઈ મોતીભાઈ પોતાનું બાઈક નંબર જીજે 36 ડી 1681 લઈને જઈ રહ્યા હતા ત્યારે પાછળથી ટ્રક ચાલકે તેઓના બાઈકને હડફેટે લીધું હતું અને અકસ્માત થયો હતો જે બનાવમાં ફરિયાદીના ભાઈને શરીરે ગંભીર ઈજાઓ થઈ હોવાના કારણે તેનું મોત નીપજ્યું હતું જે બનાવ સંદર્ભે હાલમાં મૃતક યુવાનના ભાઈએ નોંધાવેલ ફરિયાદ આધારે પોલીસે ટ્રક ચાલક સામે ગુનો નોંધી આરોપીને પકડવા માટે તજવીજ શરૂ કરેલ છે