હળવદના મયુરનગર ગામે ખોટું પેઢીનામુ, ખોટું સોગંદનામુ, ખોટી સહી કરીને વારસાઈ કરાવનારા દીકરા સામે માતાએ નોંધાવી ફરિયાદ

હળવદના મયુરનગર ગામે માતાના નામે આવેલ જમીનને પોતાના નામે કરવા માટે દીકરાએ ખોટું પેઢીનામુ, ખોટું સોગંદનામુ, ખોટી સહી કરીને ખોટી વારસાઈ બનાવી હતી અને પોતાનું તથા તેના ભાઈનું નામ વારસાઈમા ચડાવી દીધું હતું જેથી હાલમાં ભોગ બનેલ માતાએ નોંધાવેલ ફરિયાદ આધારે પોલીસે દીકરા સામે ગુનો નોંધી આરોપીને પકડવા માટે તજવીજ શરૂ કરેલ છે

મૂળ હળવદ તાલુકાના મયુરનગર ગામના રહેવાસી અને હાલમાં રાજકોટના મવડી પ્લોટ શ્રીનાથજી સોસાયટી ખાતે રહેતા ગીતાબેન દિલીપભાઈ ડાંગર (54) એ હળવદ તાલુકા પોલીસ સ્ટેશન ખાતે તેના દીકરા ધવલભાઈ દિલીપભાઈ ડાંગર રહે. શ્રીનાથજી સોસાયટી, રાજકોટ તથા તપાસમાં જેના નામ ખુલે તેની સામે ફરિયાદ નોંધાવેલ છે જેમાં જણાવ્યુ છે કે, હળવદના મયૂરનગર ગામે તેઓના નામની ખેતીની જમીન સર્વે નંબર 923 પૈકી 2 વાળી આશરે 10 વીઘા જમીન ઠગાઈ કરવાના ઇરાદે ફરિયાદીની જાણ બહાર ખોટું પેઢીનામુ, ખોટું સોગંદનામુ તૈયાર કરીને ફરિયાદીના નામની ખોટી સહીઓ કરી અથવા કરાવડાવીને ખોટી વારસાઈ બનાવી હતી અને તે ખોટી હોવાનું જાણતા હોવા છતાં પણ વારસાઈમાં પોતાનું અને પોતાના ભાઈ સાગરનું નામ ચડાવી તેનો સાચા તરીકે ઉપયોગ કરી ઠગાઈ કરી હોય હાલમાં માતાએ નોંધાવેલ ફરિયાદ આધારે પોલીસે દીકરા સામે ગુનો નોંધી આગળની કાર્યવાહી હાથ ધરી છે.