વાંકાનેર નજીક ડિવાઇડર સાથે ટાયર ઘસાઈને ફાટી જતાં કાર પલટી જતાં યુવાનનું મોત

મોરબી વાંકાનેર હાઇવે રોડ ઉપર વઘાસીયા ગામની સીમમાં આવેલ પેટ્રોલ પંપ સામેથી કાર લઈને યુવાન પસાર થઈ રહ્યો હતો ત્યારે તેની કારનું ટાયર ડિવાઇડર સાથે ઘસાતા ફાટી ગયું હતું જેથી કરીને કાર ચાલકે તેની ગાડીના સ્ટેરીંગ ઉપરથી કાબુ ગુમાવી દેતા કાર પલટી મારીને સર્વિસ રોડ ઉપર પડી હતી અને ત્યારે કાર ચાલક યુવાનને કપાળ તથા માથાના ભાગે ગંભીર ઇજા થઈ હોવાથી તેનું મોત નીપજ્યું હતું અને અકસ્માત મૃત્યુના બનાવ સંદર્ભે મૃતક યુવાનના પિતાની ફરિયાદ લઈને પોલીસે મૃતક યુવાન સામે કાર્યવાહી હાથ ધરી છે

બનાવની જાણવા મળતી માહિતી મુજબ મોરબીના ઘૂટું ગામે આવેલ આંબેડકરનગરમાં રહેતા લાલજીભાઈ ઉર્ફે લલિતભાઈ માલાભાઈ રાઠોડ (57) એ તેના મૃતક દીકરા મયુરભાઈ લાલજીભાઈ રાઠોડ (30) ની સામે વાંકાનેર સીટી પોલીસ સ્ટેશન ખાતે ફરિયાદ નોંધાવી છે જેમાં તેને જણાવ્યુ છે કે, મોરબી વાંકાનેર હાઇવે રોડ ઉપર આવેલ વઘાસીયા ગામની સીમમાં જીઓ પેટ્રોલ પંપ અને કૈલાશ પેટ્રોલ પંપની વચ્ચેના ભાગમાંથી તેનો દીકરો મયુરભાઈ વર્ના ગાડી નંબર જીજે 36 એલ 4653 લઈને પસાર થઈ રહ્યો હતો ત્યારે તેની ગાડીની ડાબી સાઈડનું ટાયર ડિવાઇડર સાથે અથડાતા ઘસાઈને ટાયર ફાટી ગયું હતું જેથી કાર ચાલકે તેની ગાડીના સ્ટેરીંગ ઉપરથી કાબુ ગુમાવતા ગાડી પલટી મારીને સર્વિસ રોડ ઉપર પડી હતી અને ત્યારે યુવાનને કપાળ અને માથાના ભાગે ગંભીર ઇજા થઈ હોવાથી તેનું મોત નીપજયું હતું અને ગાડીમાં પણ નુકસાની થયેલ હતી જે બનાવ સંદર્ભે મૃતકના પિતાએ નોંધાવેલ ફરિયાદ આધારે પોલીસે ગુનો નોંધીને આગળની કાર્યવાહી હાથ ધરી છે