હળવદના માથક ગામે ભાઈએ કરેલ મજાકનો ખાર રાખીને યુવાન ઉપર ચાર શખ્સનો હુમલો: છરી-ધોકા વડે માર માર્યો

હળવદના માથક ગામે રહેતો યુવાનનો ભાઈ ગામમાં જ રહેતા એક શખ્સની અવારનવાર મજાક કરતો હતો જે બાબતનો ખાર રાખીને યુવાન ઉપર ચાર શખ્સોએ છરી અને ધોકા વડે હુમલો કર્યો હતો અને જાનથી મારી નાખવાની ધમકી આપવામાં આવી હતી જેથી યુવાને સારવાર લીધા બાદ ફરિયાદ નોંધાવતા પોલીસે ગુનો નોંધી આરોપીઓને પકડવા માટે તજવીજ શરૂ કરી છે

જાણવા મળતી માહિતી પ્રમાણે હળવદ તાલુકાના માથક ગામે રામજી મંદિર પાસે રહેતા શક્તિસિંહ રાજુભાઈ ગોહિલ જાતે કારડીયા રાજપુત (20)એ હળવદ તાલુકા પોલીસ સ્ટેશન ખાતે સુરેશભાઈ ગોગજીભાઈ જેતપરા, રવિભાઈ રણછોડભાઈ સડાણીયા, રણછોડભાઈ પોપટભાઈ સડાણીયા અને બાબુભાઈ પોપટભાઈ સડાણીયા રહે. બધા માથક વાળાની સામે ફરિયાદ નોંધાવી છે જેમાં તેણે જણાવ્યું છે કે, ફરિયાદીનો નાનો ભાઈ નિખિલ અવારનવાર આરોપી સુરેશભાઈ જેતપરાની મજાક કરતો હતો જે બાબતનો ખાર રાખીને સુરેશભાઈ તથા રણછોડભાઈએ છરી સાથે અને રણછોડભાઈ તથા બાબુભાઈ લાકડાના ધોકા સાથે તેની પાસે આવ્યા હતા અને યુવાન ઉપર હુમલો કર્યો હતો અને ત્યારે જેમ ફાવે તેમ ગાળો આપીને લાકડાના ધોકા વડે શરીર ઉપર માર માર્યો હતો. તેમજ રવિભાઈએ ફરિયાદીને જાનથી મારી નાખવાની ધમકી આપી હતી જેથી ભોગ બનેલા યુવાનને સારવાર લીધા બાદ ચાર શખ્સોની સામે ફરિયાદ નોંધાવતા પોલીસે આરોપીઓને પકડવા માટે તજવીજ શરૂ કરી છે આ અંગેની આગળની વધુ તપાસ એન.એમ. ગોસ્વામી ચલાવી રહ્યા છે.