મોરબીમાં સગીરાને પ્રેમ જાળમાં ફસાવીને વારંવાર દુષ્કર્મ આચારનાર આરોપીની ધરપકડ

મોરબીમાં રહેતા પરિવારની સગીર વયની દીકરીને પ્રેમ જાળમાં ફસાવી હતી અને લગ્નની લાલચ આપી હતી ત્યાર બાદ તેની સાથે અવારનવાર દુષ્કર્મ આચરવામાં આવ્યું હતું જેથી ભોગ બનેલ સગીરાની માતાએ મોરબી સીટી બી ડિવિઝન પોલીસ સ્ટેશન ખાતે ફરિયાદ નોંધાવતા પોલીસે દુષ્કર્મ સહિતની કલમ હેઠળ ગુનો નોંધીને આરોપીને પકડવા માટે તજવીજ હાથ ધરી હતી અને આ ગુનામાં આરોપીને પકડીને પોલીસે આગળની કાર્યવાહી કરેલ છે.

મોરબી શહેરના સામાકાંઠા વિસ્તારમાં હાલમાં રહેતો પરિવાર અગાઉ વીસીપરા વિસ્તારમાં રહેતો હતો ત્યારે તેઓના વિસ્તારમાં રહેતા સાહિલ ઇલ્યાસભાઈ કટિયા નામના શખ્સે આ પરિવારની સગીર વયની દીકરીને પ્રેમ જાળમાં ફસાવી હતી અને ત્યારબાદ તેને લગ્નની લાલચ આપીને અવારનવાર તેની સાથે દુષ્કર્મ આચરવામાં આવ્યું હતું. જો કે, આ સગીરાનો પરિવાર ત્યાર બાદ મોરબીના વીસીપરા વિસ્તારને છોડીને મોરબીના સામાકાંઠા વિસ્તારમાં રહેવા માટે જતો રહ્યો હતો તેમ છતાં પણ સાહિલ કટિયાએ સગીરાને સંબંધ રાખવા માટે દબાણ કર્યું હતું અને તેના પરિવારને બદનામ કરવાની ધમકીઓ આપી હતી જેથી ભોગ બનેલ સગીરાની માતાએ સીટી બી ડિવિઝન પોલીસ સ્ટેશન ખાતે ફરિયાદ નોંધાવતા પોલીસે દુષ્કર્મ સહિતની કલમ હેઠળ ગુનો નોંધીને આરોપીને પકડવા માટે તજવીજ શરૂ કરી હતી અને આ ગુનામાં બી ડિવિઝન પોલીસ સ્ટેશનના પીઆઇ એન.એ. વસાવા અને તેની ટીમે આરોપી સાહિલ ઇલ્યાસભાઈ કટિયા (20) રહે. વીસીપરા મોરબી વાળાની ધરપકડ કરીને આગળની કાર્યવાહી કરેલ છે. વધુમાં પોલીસે જણાવ્યુ હતું કે, હાલમાં જે આરોપીને દુષ્કર્મના ગુનામાં પકડવામાં આવેલ છે તે અગાઉ અપહરણ અને લૂંટના ગુનામાં પકડાયેલ છે જેથી કરીને તેના રિમાન્ડ લેવા માટેની પોલીસે તજવીજ શરૂ કરી છે.