વાંકાનેરના કલાવડી નજીક ઇકો ગાડીના ચાલકે ત્રીપલ સવારી એક્ટિવાને હડફેટે લેતા એક યુવાનનું મોત, બેને ઇજા

વાંકાનેરના કલાવડી ગામના પાટીયા પાસેથી ત્રીપલ સવારી એક્ટિવા પસાર થઈ રહ્યું હતું ત્યારે તેને ઇકો ગાડીના ચાલકે હડફેટે લેતા અકસ્માતનો બનાવ બન્યો હતો જેમાં એકટીવા ચાલક યુવાનને શરીરને ગંભીર ઇજાઓ થયેલ હોવાના કારણે તેનું મોત નીપજયું હતું જ્યારે એકટીવા ઉપર બેઠેલા અન્ય બે વ્યક્તિઓને ઇજાઓ થયેલ હતી જેથી ઇજા પામેલા બંને વ્યક્તિને સારવાર માટે હોસ્પિટલે ખસેડવામાં આવ્યા હતા અને હાલમાં ઇજાગ્રસ્ત યુવાનની ફરિયાદ લઈને પોલીસે ઈકો ગાડીના ચાલક સામે ગુનો નોંધી આરોપીને પકડવા માટે તજવીજ શરૂ કરી છે

જાણવા મળતી માહિતી પ્રમાણે વાંકાનેર તાલુકાના સિંધાવદર ગામે રહેતા વિશાલભાઈ ધારાભાઈ બાંભવા (21)એ વાંકાનેર તાલુકા પોલીસ સ્ટેશન ખાતે ઇકો ગાડી નંબર જીજે 3 જેસી 7186 ના ચાલક સામે ફરિયાદ નોંધાવી છે જેમાં જણાવ્યુ છે કે, વાંકાનેર તાલુકાના કલાવડી ગામના પાટીયા પાસે ગેસના પ્લાન્ટની સામેથી તેઓ એકટીવા નંબર જીજે 36 એડી 6069 માં ગોપાલભાઈ ઉર્ફે વિશાલ પરબતભાઈ બાંભવા (19)ની પાછળ બેસીને ત્રીપલ સવારીમાં પસાર થઈ રહ્યા હતા ત્યારે ઇકો ગાડીના ચાલકે તેઓના ત્રીપલ સવારી એકટીવાને હડફેટે લેતા એકટીવા ચાલક ગોપાલભાઈ બાંભવાને ગંભીર ઇજાઓ થઈ હોવાના કારણે તેનું મોત નીપજ્યું હતું અને ફરિયાદીને જમણા પગમાં ફેક્ચર તેમજ તેની પાછળ બેઠેલા સંદીપભાઈને જમણા હાથની કોણી, માથા અને પગે ગંભીર ઇજા થયેલ હતી જેથી તે બંનેને સારવાર માટે હોસ્પિટલે ખસેડવામાં આવ્યા હતા અને અકસ્માતના બનાવ સંદર્ભે હાલમાં ઇજા પામેલા યુવાનની ફરિયાદ લઈને ઇકો ગાડીના ચાલક ગુનો નોંધીને આરોપીને પકડવા માટે તજવીજ શરૂ કરેલ છે.