વાંકાનેર નજીક હોટલ પાસે જમ્યા બાદ ઉભેલા બે વ્યક્તિને કાર ચાલકે હડફેટે લેતા એકનું મોત

વાંકાનેર ચોટીલા હાઈવે રોડ ઉપર આવેલ હોટલ પાસે જમ્યા બાદ બે વ્યક્તિ રોડ પાસે ઉભા હતા દરમિયાન વાંકાનેર બાઉન્ડ્રી તરફથી આવેલ કારના ચાલકે તે બંને વ્યક્તિને હડફેટે લેતા એક વ્યક્તિને માથા અને જમણા હાથમાં ઇજા થઈ હતી જ્યારે બીજા વ્યક્તિને ડાબા પગના સાથળમાં તથા કાંડાના ભાગે ગંભીર ઈજા થઈ હોવાથી તેનું મોત નીપજ્યું હતું જે બનાવ સંદર્ભે ઇજા પામેલા યુવાનની ફરિયાદ લઈને પોલીસે આગળની કાર્યવાહી હાથ ધરી છે

જાણવા મળતી માહિતી મુજબ રાજસ્થાનના ગોલીયાર ગામે રહેતા નૂરાખાન સફૂરખાન કુંભાર (25) એ કાર નંબર જીજે 36 એલ 9229 ના ચાલક સામે વાંકાનેર સિટી પોલીસ સ્ટેશન ખાતે ફરિયાદ નોંધાવેલ છે જેમાં જણાવ્યું છે કે, વાંકાનેર ચોટીલા હાઈવે રોડ ઉપર આવેલ વતન હોટલ પાસે ફરિયાદી તથા સિકંદરખાન અબ્બાસખાન જમ્યા પછી બહાર રોડના ભાગે ઉભા હતા ત્યારે વાંકાનેર બાઉન્ડ્રી તરફથી કાર ચાલક પોતાની કાર લઈને આવ્યો હતો અને તેણે ફરિયાદી તથા મરણ જનારને હડફેટે લેતા ફરીયાદીને માથા અને જમણા હાથમાં ઇજા થઈ હતી જ્યારે મરણ જનાર સિકંદરખાનને ડાબા પગના સાથળ અને કાંડાના ભાગે ફેક્ચર જેવી ગંભીર ઇજા થયેલ હોવાથી તેનું મોત નીપજયું હતું જેથી અકસ્માત મૃત્યુના બનાવ સંદર્ભે ઇજા પામેલા યુવાનની ફરિયાદ લઈને પોલીસે કાર ચાલક સામે ગુનો નોંધી આરોપીને પકડવા માટે આગળની કાર્યવાહી હાથ ધરી છે

બાઇક ચોરી

મોરબીમાં ઋષિકેશ સ્કુલની સામેના ભાગમાં આવેલ કમલા પાર્ક વિસ્તારમાં રહેતા વનરાજભાઈ નાનુભાઈ વાઢેર (26) નામના યુવાને બી ડિવિઝન પોલીસ સ્ટેશન ખાતે વાહન ચોરીની ફરિયાદ નોંધાવેલ છે જેમાં તેને જણાવ્યું છે મોરબીમાં પાડાપુલ નીચે સ્વામીનારાયણ મંદિર તરફ જતા રસ્તે તેણે પોતાનું બાઈક નંબર જીજે 1 જેડબલ્યુ 6413 પાર્ક કરીને મૂક્યું હતું જે 15,000 રૂપિયાની કિંમતનું બાઈક ચોરી કરવામાં આવેલ છે જેથી ભોગ બનેલ યુવાને નોંધાવેલ ફરિયાદ આધારે પોલીસે ગુનો નોંધીને આરોપીને પકડવા માટે તજવીજ શરૂ કરેલ છે