ઇલેક્ટ્રીક શોર્ટ લાગતાં મોરબીના માધાપરમાં આધેડ અને ટંકારાના મેઘપર ઝાલા ગામે યુવાનનું મોત

મોરબીના માધાપર શેરી નંબર 17 માં કપિલા હનુમાન પાસે રહેતા આધેડ પોતાના ઘરમાં ગાય દોવા માટે જતા હતા ત્યારે ઈલેક્ટ્રીક બોર્ડમાં અડી જવાના કારણે તેઓને શોર્ટ લાગ્યો હતો અને તેનું મોત નીપજયું હતું આવી જ રીતે ટંકારાના મેઘપર ઝાલા ગામે વાડીના ગોડાઉનની છત ઉપર ચડતી વખતે ઈલેક્ટ્રીક શોર્ટ લગતા યુવાનનું મોત નીપજ્યું હતું.

મોરબીમાં માધાપર શેરી નંબર 17 માં કપિલા હનુમાન પાસે રહેતા કાલુભા ગોવિંદભાઇ ગુઢડા (53) નામના આધેડ પોતે પોતાના ઘરના ફળિયામાં બાંધેલ ગાયને દોવા માટે થઈને જતા હતા દરમ્યાન ફળિયામાં દિવાલમાં લગાવેલ ઈલેક્ટ્રીકના બોર્ડમાં અડી જવાના કારણે તેમને ઇલેક્ટ્રીક શોટ લાગ્યો હતો જેથી કરીને 108 એમ્બ્યુલન્સ મારફતે તાત્કાલિક તેઓને મોરબીની સિવિલ હોસ્પિટલ ખાતે લઈને આવ્યા હતા અને ત્યાં ફરજ પરના ડોક્ટરે તેઓને જોઈ તપાસીને મૃત જાહેર કર્યા હતા અને આ બનાવની એ ડિવિઝન પોલીસને જાણ કરતા પોલીસે બનાવની નોંધ કરી આગળની રાબેતા મુજબની કાર્યવાહી હાથ ધરી છે.

જયારે ટંકારા તાલુકાના મેઘપર ઝાલા ગામે રહેતા દેવેન્દ્રસિંહ રણજીતસિંહ ઝાલા (32) નામનો યુવાન ગામની ડાભોડિયા નામની સીમમાં પોતાની વાડીએ હતો અને વાડીએ કામ કરતાં સમયે ગોડાઉનની છત ઉપર ચડતી વખતે સીડી ઉપરથી પસાર થતી ઈલેક્ટ્રીક લાઈનના વાયરને અડી જવાના કારણે તેને ઈલેક્ટ્રીક લાગ્યો હતો જેથી તેનું મોત નીપજ્યું હતું ત્યારબાદ તેના મૃતદેહને ટંકારાની સરકારી હોસ્પિટલ ખાતે લઈને આવ્યા હતા અને ત્યાં ફરજ પરના ડોક્ટરે તેને જોઈ તપાસીને મૃત જાહેર કર્યા બાદ આ બનાવની ટંકારા તાલુકા પોલીસને જાણ કરતા પોલીસે બનાવની નોંધ કરી આગળની રાબેતા મુજબની કાર્યવાહી હાથ ધરી છે.