મોરબીના નવાગામ (લખધીરનગર) પાસે વીજ પોલમાંથી ઇલેક્ટ્રીક શોટ લગતા ભેંસનું મોત

મોરબીના નવાગામ (લખધીરનગર) ગામે રહેતા માલધારીની ભેંસને કોઈ કારણોસર વીજ પોલમાંથી ઇલેક્ટ્રીક શોટ લાગ્યો હતો જેથી કરીને ભેંસનું મોત નીપજયું હતું અને આ બનાવની તાલુકા પોલીસ સ્ટેશન ખાતે જાણ કરતા પોલીસે બનાવની નોંધ કરી આગળની કાર્યવાહી હાથ ધરી છે.

બનાવની જાણવા મળતી માહિતી મુજબ મોરબી તાલુકાના નવાગામ (લખધીનગર) ખાતે રહેતા પેથાભાઇ ધારાભાઈ ટમારીયાએ મોરબી તાલુકા પોલીસ સ્ટેશન ખાતે જાણ કરી હતી કે મચ્છુ ડેમ નજીકથી તેઓની ભેંસ પસાર કરી હતી દરમિયાન તેને વીજ પોલમાંથી કોઈ કારણોસર ઇલેક્ટ્રીક શોટ લાગતા પેથાભાઇની ભેંસનું મોત નીપજ્યું હતું આ બનાવ અંગેની તેઓએ તાલુકા પોલીસ સ્ટેશન ખાતે જાણ કરતા પોલીસે બનાવની નોંધ કરી આગળની રાબેતા મુજબની કાર્યવાહી હાથ ધરી છે.

કાર-બાઇક વચ્ચે અકસ્માત

મોરબીના રવાપર રોડ ઉપર આવેલ ચિંતામણી કોમ્પલેક્ષ પાસે બાઈક અને કાર વચ્ચે અકસ્માતનો બનાવ બન્યો હતો જે બનાવમાં ક્રિષ્નાબેન કપિલભાઈ પંડ્યા (37) રહે. ચંદ્રેશનગર સનાળા રોડ મોરબી વાળાને ઇજા થતાં તેને સારવાર માટે મોરબીની ખાનગી હોસ્પિટલમાં લાવ્યા હતા અને ત્યાં તેને સારવાર આપીને આ બનાવની પોલીસને જાણ કરતા પોલીસે બનાવની નોંધ કરી આગળની રાબેતા મુજબની કાર્યવાહી હાથ ધરી છે

અકસ્માતમાં ઇજા

મોરબીના રવાપર નજીક રહેતા પાર્વતીબેન લાલજીભાઈ પાંચોટિયા (89) નામના વૃદ્ધા બાઈકમાં બેસીને જઈ રહ્યા હતા દરમિયાન બાપા સીતારામ ચોક નજીક બાઇક સ્લીપ થવાથી અકસ્માત થયો હતો જે બનાવમાં ઈજા પામેલ વૃદ્ધાને સારવાર માટે હોસ્પિટલે લઈ ગયા હતા અને આ બનાવની હોસ્પિટલ મારફતે પોલીસને જાણ કરતા પોલીસે બનાવની નોંધ કરી આગળની કાર્યવાહી હાથ ધરી છે.