વાંકાનેરના વઘાસિયા ટોલનાકાનો કોન્ટ્રાક્ટ પાછો લેવા જૂના કોન્ટ્રાક્ટરે હથિયાર બતાવીને મેનેજરને આપી ધમકી: 4 સામે ફરિયાદ

વાંકાનેર નજીક આવેલ વઘાસિયા ટોલનાકાના મેનેજરને અગાઉ ટોલનાકાનો કોન્ટ્રાક્ટ રાખનાર વ્યક્તિ દ્વારા ટોલનાકાની ઓફિસમાં આવીને પોતાનું લાયસન્સ વાળું હથિયાર બતાવીને ધમકી આપવામાં આવી હતી અને કોન્ટ્રાક્ટ પરત આપવાનું કહીને ગાળો આપીને જાનથી મારી નાખવાની ધમકી આપવામાં આવી હતી જેથી ભોગ બનેલ મેનેજર દ્વારા હાલમાં વાંકાનેર સીટી પોલીસ સ્ટેશન ખાતે 4 શખ્સોની સામે ફરિયાદ નોંધાવતા પોલીસે ગુનો નોંધી આરોપીને પકડવા માટે તજવીજ શરૂ કરી છે

મૂળ બિહારના રહેવાસી અને હાલમાં મિસરી હોટલ પાછળ સાઈનાથ એપાર્ટમેન્ટમાં રહેતા અને વઘાસીયા ટોલનાકામાં મેનેજર તરીકે ફરજ બજાવતા મુકેશકુમાર નિર્ભયકુમાર સુધાંશુ (37)એ રવિરાજસિંહ ઝાલા, હરુભા તથા અજાણ્યા બે શખ્સોની સામે ફરિયાદ નોંધાવેલ છે જેમાં તેણે જણાવ્યું છે કે, તેઓ વઘાસીયા ટોલનાકે પોતાની ઓફિસમાં હતા ત્યારે ચારેય આરોપીઓ તેની ઓફિસમાં આવ્યા હતા અને ત્યારે રવિરાજસિંહ ઝાલાએ પોતાના લાયસન્સ વાળા હથિયાર ઉપર હાથ રાખીને આરોપીઓને ટોલનાકાનો અગાઉ કોન્ટ્રાક્ટ હતો જે મૂકી દીધેલ હોય તેને પરત આપવા માટે ફરિયાદીને કહ્યું હતું અને ફરિયાદીને ગાળો આપીને જાનથી મારી નાખવાની ધમકી આપવામાં આવી હતી જેથી ભોગ બનેલ યુવાને વાંકાનેર સિટી પોલીસ સ્ટેશન ખાતે ફરિયાદ નોંધાવતા પોલીસે ગુનો નોંધીને આરોપીને પકડવા માટે તજવીજ શરૂ કરેલ છે.