મોરબીમાં બોલાચાલીનો ખાર રાખીને ક્રેટા ગાડી ઉપર સ્કોર્પિયો ચડાવી દેવાનો પ્રયાસ

મોરબીના વીસીપરા વિસ્તારમાં રહેતા યુવાનને સામે વાળાના ભાઈ સાથે બોલાચાલી થઈ હતી જેનો ખાર રાખીને યુવાનને ફોન ઉપર જાનથી મારી નાખવાની ધમકી આપવામાં આવી હતી તેમજ સામેવાળા શખ્સે સ્કોર્પિયો ગાડીમાં આવીને યુવાનના મિત્રની ક્રેટા ગાડીમાં વાહન અથડાવ્યું હતું અને ક્રેટા ગાડીમાં નુકશાન કર્યું હતું જેથી હાલમાં યુવાને નોંધાવેલ ફરિયાદ આધારે પોલીસે ગુનો નોંધી આરોપીને પકડવા માટે તજવીજ શરૂ કરેલ છે.

મોરબીના વીસીપરા વિસ્તારમાં આવેલ કુલીનગર-1 માં રહેતા શાહરુખભાઈ ફિરોજભાઈ પઠાણ (32) એ સાજીદભાઈ સાબુદીનભાઈ જેડા રહે.યમુનાનગરની સામે ફરિયાદ નોંધાવેલ છે જેમાં બે દિવસ પહેલા આરોપીના ભાઈ સાથે ફરિયાદીને બોલાચાલી થયેલ હતી તે બાબતનો ખાર રાખીને આરોપીએ ફરિયાદીને ફોન ઉપર જાનથી મારી નાખવાની ધમકી આપી હતી. દરમ્યાન ગઈકાલે સાંજના છ વાગ્યાના અરસામાં વીસીપરા મેઇન રોડ ઉપર ગોવિંદભાઈના ડેલા પાસે ફરિયાદી તેના મિત્રની ક્રેટા ગાડી નંબર જીજે 36 એઆર 4143 માં હતા ત્યારે આરોપી તેની સ્કોર્પિયો ગાડી લઈને આવ્યો હતો અને ક્રેટા ગાડીમાં વાહન અથડાવ્યું હતું જેથી ક્રેટા ગાડીમાં જમણી બાજુના દરવાજામાં, આગળ અને પાછળના બોનેટ-બમ્પરમાં નુકસાન કર્યું હતું આ બનાવ સંદર્ભે હાલમાં યુવાને નોંધાવેલ ફરિયાદ આધારે પોલીસે ગુનો નોંધ આરોપીને પકડવા માટે તજવીજ શરૂ કરેલ છે.