મોરબીમાં આંગડિયા પેઢીની ઓફિસમાં જુગાર રમતા પાંચ જુગારી એક લાખની રોકડ સાથે પકડાયા

મોરબીના સરદાર રોડ ઉપર આવેલ ધરતી ટાવરમાં આંગડિયા પેઢીની ઓફિસમાં જુગાર રમતા હોવાની હકીકત મળી હતી જેના આધારે મોરબી એ ડિવિઝન પોલીસની ટીમ દ્વારા ત્યાં જુગારની રેડ કરવામાં આવી હતી ત્યારે સ્થળ ઉપર જુગાર રમતા પાંચ શખ્સો મળી આવ્યા હતા જેથી કરીને પોલીસે ૧,૦૦,૩૦૦ ની રોકડ કબજે કરી મોરબી એ ડિવિઝન પોલીસ સ્ટેશન ખાતે જુગારધારા હેઠળ ગુનો નોંધી આગળની કાર્યવાહી હાથ ધરી છે

બનાવની જાણવા મળતી માહિતી મુજબ મોરબી એ ડિવિઝન પોલીસની ટીમ પેટ્રોલિંગમાં હતી ત્યારે મોરબીના સરદાર રોડ ઉપર આવેલ ધરતી ટાવરમાં ભવાની એક્સપ્રેસ નામના આંગડિયા પેઢીની ઓફિસમાં જુગાર રમતા હોવા અંગેની હકીકત મોરબી એ ડિવિઝન પોલીસ સ્ટેશનના ચકુભાઈ કરોતરાને મળી હતી જેના આધારે મોરબી એ ડિવિઝન પોલીસની ટીમ દ્વારા ત્યાં જુગારી રેડ કરવામાં આવી હતી ત્યારે સ્થળ ઉપર જુગાર રમતા મહેશભાઈ રમણલાલ પટેલ (૪૫) રહે. આલાપ રોડ શિવરંજની એપાર્ટમેન્ટ બ્લોક નંબર-૭૦૧ મોરબી, ભીખાજી ઉર્ફે ભાણો દિવાનજી ઠાકોર (૩૬) રહે. સનાળા રોડ ડાર્વિન એપાર્ટમેન્ટ ફ્લેટ નંબર-૨૦૨ મોરબી, દિલીપભાઈ રામાભાઇ પટેલ (૪૦) રહે. ધરતી ટાવર મણીલાલ મગનલાલની ઓફિસમાં મોરબી, સંજયકુમાર અંબાલાલ પટેલ (૪૦) રહે. વાવડી રોડ ગાયત્રીનગર સોસાયટી મોરબી અને ભાવેશકુમાર ચંદુલાલ પટેલ (૪૨) રહે. વાવડી રોડ ઉમિયા પાર્ક સોસાયટી મોરબી વાળા જુગાર રમતા મળી આવ્યા હોય પોલીસે તેની પાસેથી ૧,૦૦,૩૦૦ ની રોકડ કબજે કરી હતી અને મોરબી એ ડિવિઝન પોલીસ સ્ટેશન ખાતે જુગારધારા હેઠળ ગુનો નોંધીને આગળની રાબેતા મુજબની કાર્યવાહી હાથ ધરી છે