હળવદમાં એક પખવાડિયાથી ગેરહાજર પોલીસ હેડ કોન્સટેબલ સામે પીઆઇએ નોંધાવી ફરિયાદ

હળવદ તાલુકામાં પોલીસ સ્ટેશનમાં હેડ કોન્સ્ટેબલ પોતાની ફરજ ઉપર છેલ્લા એક પખવાડિયાથી હાજર થયેલ નથી અને ફરજમાં ગેરહાજર પોલીસ કર્મચારીને નોટિસ આપવામાં આવી છતાં પણ તે હાજર થયેલ નથી જેથી હળવદના પીઆઇ દ્વારા ફરિયાદ નોંધાવવામાં આવેલ છે જેના આધારે ગુનો નોંધીને આગળની કાર્યવાહી હાથ ધરી છે.

જાણવા મળતી માહિતી મુજબ હળવદ તાલુકા પોલીસ સ્ટેશનના પીઆઇ રાજેશ તુલજાશંકર વ્યાસ દ્વારા હળવદ તાલુકા પોલીસ સ્ટેશનના હેડ કોન્સ્ટેબલ હરપાલસિંહ જયેન્દ્રસિંહ પરમારની સામે ફરિયાદ નોંધાવવામાં આવેલ છે. જેમાં જણાવ્યુ છે કે, પોલીસ કર્મચારી ગત તા. 2/7 થી તા 16/7 ના બપોરના બે વાગ્યા સુધીના સમય દરમિયાન પોતાની ફરજમાં ગેરહાજર રહેલ છે. અને ફરજ ઉપર હાજર થવા માટે એક કે બે નહીં પરંતુ ત્રણ વખત નોટિસની બજવણી કરવામાં આવી છે. તેમ છતાં પણ મનસ્વી રીતે પોતે પોતાની ફરજમાં ગેરહાજર રહેતા હળવદ તાલુકા પોલીસ સ્ટેશનના પીઆઇ દ્વારા હેડ કોન્સ્ટેબલની સામે ફરિયાદ નોંધાવવામાં આવી છે અને જીપી એક્ટની કલમ 145 (2) (c) મુજબ ગુનો નોંધીને આગળની કાર્યવાહી હાથ ધરી છે આ અંગેની આગળની વધુ તપાસ હળવદ તાલુકા પોલીસ સ્ટેશનના પીએસઆઇ વાય.પી. વ્યાસ ચલાવી રહ્યા છે

બાઇક સ્લીપ

મોરબીના સનાળા રોડે રહેતા ધર્મેશભાઈ રામુભાઈ મિયાત્રા (44) નામનો યુવાન બાઇક લઈને મોરબીના અયોધ્યાપુરી રોડ ઉપર ધર્મેન્દ્ર ટ્રેડિંગ પાસેથી જતો હતો ત્યારે ત્યાં બાઇક સ્લીપ થવાના કારણે તેને ઈજા થઇ હતી જેથી તેને સારવાર માટે મોરબીની સિવિલ હોસ્પિટલ ખાતે લાવ્યા હતા અને આ બનાવની એ ડિવિઝન પોલીસને જાણ કરતા પોલીસે બનાવની નોંધ કરી આગળની કાર્યવાહી હાથ ધરી છે અને આ બનાવની વિપુલભાઈ પટેલ દ્વારા પ્રાથમિક તપાસ કરવામાં આવી હતી.