ખેલે ભી ખીલે ભી: મોરબીના ધારાસભ્યો-અધિકારીઓની હાજરીમાં સાયકલ રેલી યોજાઈ

મોરબીમાં મેજર ધ્યાનચંદજીની જન્મ જયંતી નિમિત્તે નેશનલ સ્પોર્ટ્સ ડે ની ઉજવણી અંતર્ગત ખેલે ભી ખીલે ભી ની થીમ સાથે સાયકલ રેલીનું આયોજન કરવામાં આવ્યું હતું અને મોરબીમાં આવેલ પોલીસ પરેડ ગ્રાઉન્ડથી ધારાસભ્યો અને અધિકારીઓની હાજરીમાં આ રેલીને શરૂ કરવામાં આવી હતી.

સાયકલ ઓન સંડેની થીમ સાથે લોકોને ફિટનેશ માટે જાગૃત કરવા માટે કાર્યક્રમ યોજાઇ રહ્યા છે તેવામાં મોરબીમાં હોકીના જાદુગર એવા શ્રી મેજર ધ્યાનચંદની જન્મ જયંતી નિમિતે સાયકલ રેલીનું આયોજન કરવામાં આવ્યું હતું જે રેલી મોરબીના પોલીસ પરેડ ગ્રાઉન્ડથી શરૂ કરવામાં આવી હતી અને ત્યાર બાદ રવાપર રોડ, સ્વાગત ચોકડી, ઉમિયા સર્કલ અને શ્રી સરદાર પટેલ સ્ટેચ્યુ નવા બસ સ્ટેશન પાસે આ 7 કિમી લાંબી સાયકલ રેલી પૂરી કરવામાં આવી હતી આ સાયકલ રેલીમાં ધારાસભ્ય કાંતિભાઈ અમૃતિયા તથા દુર્લભજીભાઈ દેથરીયા તેમજ મોરબી જિલ્લા ભાજપના પ્રમુખ જયંતિભાઈ રાજકોટિયા સહિતના રાજકીય આગેવાનો તેમજ એસપી મુકેશ પટેલ, ડીવાયએસપી પી.એ.ઝાલા, સમીર સારડા અને વિરલ દલવાડી સહિતના અધિકારી સાયકલ રેલીમાં જોડાયા હતા. ખાસ કરીને મોરબીના લોકોમાં તંદુરસ્તી બાબતે જાગૃતિ ફેલાવવા તથા મેજર ધ્યાનચંદજીને શ્રદ્ધાંજલિ અર્પણ કરવાના હેતુથી જિલ્લા રમત ગમત કચેરી અને જિલ્લા વહીવટી તંત્ર દ્વારા વહેલી સવારે સાયકલ રેલી યોજીને લોકોને સ્વસ્થ જીવનશૈલી અને ફિટનેસનો સંદેશો આપવામાં આવ્યો હતો. આ રેલીમાં હળવદ પ્રાંત અધિકારી ધાર્મિક ડોબરીયા, મનપાના ડેપ્યુટી કમિશ્નર સંજય સોની, જિલ્લા રમત ગમત અધિકારી રવિભાઈ રાઠોડ, પોલીસના જવાનો તેમજ DLSS ના રમતવીરો અને વિવિધ શાળાઓના વિદ્યાર્થીઓએ ભાગ લીધેલ હતો.