હળવદ નજીક દંપતીનું મોત નિપજાવનાર કાર ચાલક સામે ગુનો નોંધાયો

હળવદ ધાંગધ્રા હાઇવે ઉપર આવેલ કવાડિયા ગામના પાટીયા પાસે કાર ચાલકે ડબલ સવારી બાઇકને હડફેટે લીધું હતું જેથી કરીને દંપતીનું મોત નીપજ્યું હતું જે બનાવ સંદર્ભે હાલમાં મૃતકના દીકરાએ કાર ચાલક સામે હળવદ તાલુકા પોલીસ સ્ટેશન ખાતે ફરિયાદ નોંધાવતા પોલીસે ગુનો નોંધીને આરોપીને પકડવા માટે તજવીજ શરૂ કરેલ છે

જાણવા મળતી માહિતી મુજબ હળવદ તાલુકાના કવાડિયા ગામે રહેતા દિનેશભાઈ જીલુભાઈ ચારોલા (૨૪)એ હાલમાં ક્રેટા ગાડી નંબર જીજે ૧૨ ડીએસ ૨૨૭૭ ના ચાલક સામે હળવદ તાલુકા પોલીસ સ્ટેશન ખાતે ફરિયાદ નોંધાવી હતી જેમાં તેણે જણાવ્યુ છે કે, હળવદ ધાંગધ્રા હાઈવે ઉપર આવેલ કવાડિયા ગામના પાટીયા પાસેથી તેઓના પિતા જીલુભાઈ ચારોલા બાઈક નંબર જીજે ૧૩ કયું ૭૪૧૩ લઈને રસ્તા ઉપર થી પસાર થઈ રહ્યા હતા ત્યારે તેઓના બાઈકમાં ફરિયાદીના માતા તેજુબેન ચારોલા પણ બેઠેલા હતા દરમિયાન આ ડબલ સવારી બાઇકને ક્રેટા કારના ચાલકે હડફેટે લીધું હતું જેથી અકસ્માતનો બનાવ બન્યો હતો અને તેમાં ફરિયાદીના પિતાને માથાના ભાગે ગંભીર ઇજા થઈ હોવાથી તેનું મોત નિપજ્યું હતું તેમજ તેની માતાને પણ શરીરે અને માથામાં ગંભીર ઇજા થયેલ હોવાથી તેનું પણ સારવાર દરમિયાન મોત નીપજયું હતું જેથી અકસ્માતના આ બનાવમાં મૃતકના દીકરા દિનેશભાઈ ચારોલાએ નોંધાવેલ ફરિયાદ આધારે પોલીસે ગુનો નોંધીને ક્રેટા ગાડીના ચાલકને પકડવા માટે તજવીજ શરૂ કરેલ છે