હળવદની હરિ દર્શન ચોકડીએ ટ્રકની પાછળ ટ્રક અથડાતાં એકનું મોત

હળવદ માળીયા હાઇવે રોડ ઉપર આવેલ હરિ દર્શન ચોકડી પાસે આગળ જઈ રહેલા ટ્રકના પાછળના ભાગમાં ટ્રક અથડાયો હતો જેથી કરીને ટ્રકમાં બેઠેલ વ્યક્તિને ગંભીર ઇજા થવાથી તેનું મોત નીપજયું હતું અને એક વ્યક્તિને ઈજા થઈ હતી જેથી કરીને ઈજા પામેલ વ્યક્તિની ફરિયાદ લઈને પોલીસે આગળની રાબેતા મુજબની કાર્યવાહી હાથ ધરી છે

બનાવની જાણવા મળતી માહિતી મુજબ કચ્છ જિલ્લાના ભુજ તાલુકામાં આવતા સામત્રા ગામના રહેવાસી અને ડ્રાઇવિંગ કરતા નથુભાઈ હમીરભાઈ રબારી (૨૭) નામના યુવાને હળવદ તાલુકા પોલીસ સ્ટેશન ખાતે મૃતક સોમાભાઈ બીજલભાઇ રબારી રહે. મેઘપર તાલુકો લખપત વાળાની સામે ફરિયાદ નોંધાવેલ છે જેમાં તેને જણાવ્યું છે કે, હળવદ માળિયા હાઇવે રોડ ઉપર હળવદ નજીક આવેલ હરિ દર્શન ચોકડી પાસેથી તેઓ પસાર થઈ રહ્યા હતા ત્યારે ટ્રક નંબર જીજે ૧૨ એઝેડ ૭૨૦૯ ના ચાલકે આગળ જઈ રહેલા ટ્રકના ઠાઠામાં તેનું વાહન અથડાયું હતું જેથી કરીને ફરિયાદીને જમણી બાજુ આંખની નીચેના ભાગમાં ઈજા થઈ હતી તેમજ મૃતકને પેટના ભાગે ગંભીર ઇજા થઈ હોવાથી તેનું મોત નીપજ્યું હતું હાલમાં ઇજાગ્રસ્ત વ્યક્તિની ફરિયાદ લઈને હળવદ પોલીસે મૃતક સામે ગુનો નોંધી આગળની રાબેતા મુજબની કાર્યવાહી હાથ ધરી છે