મોરબીમાં ટ્રાફિકની સિગ્નલ તોડીને પોલીસકર્મીને ધમકી: ત્રણ શખ્સો સામે હવે નોંધાયો ગુનો

મોરબીની રવાપર ચોકડી પાસે ટ્રાફિક પોઇન્ટ ઉપર ફરજ બજાવતા પોલીસ કર્મચારીએ લાઇન બંધ હોવા છતાં એક્ટિવા લઈને નીકળેલા શખ્સને એકટીવા રોકો માટે કહ્યું હતું ત્યારે તે જતો રહ્યો હતો અને ત્યાર બાદ કારમાં બે શખ્સો સાથે તે ત્યાં આવ્યો હતો અને ટ્રાફિક પોલીસને ગાળો આપીને તું ટ્રાફિક પોઇન્ટ ઉપર ઉભો રે તને ફૂટબોલની જેમ કેમ ઉડાવું છું તે જોજે તેવું કહીને ધમકી આપી હતી જેથી ભોગ બનેલા પોલીસ કર્મચારી દ્વારા એ ડિવિઝન પોલીસ સ્ટેશન ખાતે ત્રણ શખ્સોની સામે ફરિયાદ નોંધાવવામાં આવતા પોલીસે ગુનો નોંધી આરોપીઓને પકડવા માટે શરૂ કરેલ છે

જાણવા મળતી માહિતી મુજબ મોરબીમાં ટ્રાફિક પોલીસ તરીકે રવાપર ચોકડીના પોઈન્ટ ઉપર ફરજ બજાવતા જીગ્નેશભાઈ પ્રવીણભાઈ લાંબા એ હાલમાં મોરબી એ ડિવિઝન પોલીસ સ્ટેશન ખાતે એકટીવા નંબર જીજે 36 એએમ 8180 ના ચાલક યશ મેરામભાઇ બાલાસરા તથા તેની સાથે બ્લુ કલરની સ્વીફ્ટ કારમાં આવેલા બે અજાણ્યા શખ્સોની સામે ફરિયાદ નોંધાવેલ છે જેમાં તેને જણાવ્યૂ છે કે, તેઓ તારીખ 4/5 ના રોજ સાંજે સાતેક વાગ્યાના અરસામાં પોતાના પોઈન્ટ ઉપર ફરજ બજાવી રહ્યા હતા ત્યારે ઉમિયા સર્કલથી રવાપર ચોકડી બાજુ આવવાના રસ્તા ઉપરની સાઈડ બંધ હતી અને તે સાઈડ તોડીને એકટીવા ચાલક પોતાનું વાહન લઇને ત્યાંથી પસાર થઈ રહ્યો હતો જેથી પોલીસે તેને રોકવા માટે કહ્યું હતું છતાં તે બોલાચાલી કરીને જતો રહ્યો હતો અને ત્યારબાદ કારમાં બીજા બે શખ્સો સાથે લઈને આવ્યો હતો અને ત્યાં ટ્રાફિક પોઇન્ટ ઉપર બોલાચાલી કરીને ફરિયાદીને ગાળો આપી હતી તથા “તુ ટ્રાફિક પોઇન્ટ ઉપર ઉભો રહે તને ફૂટબોલની જેમ કેમ ઉડાવું છું તે જોજે” તેમ કહીને ફરિયાદીને ધમકી આપી હતી તથા તેની કાયદેસરની ફરજમાં રૂકાવટ કરી હતી જેથી પોલીસ કર્મચારી દ્વારા નોંધવામાં આવેલ ફરિયાદ આધારે પોલીસે હાલમાં ત્રણ શખ્સો સામે ગુનો નોંધીને આરોપીઓને પકડવા માટે તજવીજ શરૂ કરી છે