મારે તારી પત્ની સાથે કોઈ સંબંધ નથી, ખોટા નામ કેમ આપે છે કહીને હળવદના નવા અમરાપરમાં યુવાન ઉપર છરી વડે હુમલો

હળવદ તાલુકાના નવા અમરાપર ગામે રહેતા યુવાનના ઘરે આવીને એક શખ્સે “મારે તારી પત્ની સાથે કોઈ સંબંધ નથી. તું મારા ખોટા નામ કેમ આપે છે” તેવું કહીને બોલાચાલી કરી હતી અને ત્યારબાદ તેના હાથમાં રહેલ છરી વડે યુવાન ઉપર હુમલો કરી તેને ગળાના ભાગે ઇજા કરી હતી જેથી ઇજા પામેલા યુવાને સારવાર લીધા બાદ હાલમાં હળવદ તાલુકા પોલીસ સ્ટેશન ખાતે ફરિયાદ નોંધાવતા પોલીસે ગુનો નોંધી આરોપીને પકડવા માટે તજવીજ શરૂ કરેલ છે

બનાવની જાણવા મળતી માહિતી મુજબ હળવદ તાલુકાના નવા અમરાપર ગામે રહેતા રાજુભાઈ મેરૂભાઈ બાલાસણીયા જાતે અનુ. જાતી (૨૭)એ હાલમાં હળવદ તાલુકા પોલીસ સ્ટેશન ખાતે કિશન ચંપકભાઈ બાલાસણીયા રહે. ઘનશ્યામગઢ વાળાની સામે ફરિયાદ નોંધાવી છે જેમાં તેને જણાવ્યૂ છે કે, આરોપીએ ફરિયાદીના ઘરે આવીને મારે તારી પત્ની સાથે કોઈ સંબંધ નથી તું મારા ખોટા નામ કેમ આપે છે તેવું કહીને તેની સાથે બોલાચાલી કરી હતી અને ત્યારબાદ આરોપીએ પોતાના હાથમાં રહેલ છરી વડે યુવાન ઉપર હુમલો કરીને તેને ગળાના ભાગે ગંભીર ઇજા કરી હતી જેથી કરીને સારવાર માટે હોસ્પિટલ લઈ ગયા હતા અને સારવાર લીધા બાદ હાલમાં રાજુભાઈ નોંધાવેલ ફરિયાદ આધારે પોલીસે આઈપીસી કલમ ૩૨૪, ૪૫૨ અને જીપી એક્ટની કલમ ૧૩૫ મુજબ ગુનો નોંધીને આરોપીને પકડવા માટે તજવીજ શરૂ કરેલ છે