મોરબી મહાપાલીકાને મળી માળખાકીય સુવિધા-નવો રીંગ રોડ મળશે: ધારાસભ્ય દુર્લભજીભાઈ દેથરીયા

ગુજરાત રાજયના મુખ્યમંત્રી ભુપેન્દ્રભાઈ પટેલના નેતૃત્વમાં નાણામંત્રી કનુભાઈ દેસાઈ દ્વારા ગુજરાતની નવનિર્મિત નવ મહાપાલીકાઓને મહેકમ તથા માળખાકીય સુવિધાઓ ઉપલબ્ધ કરવા માટે ૨૩૦૦ કરોડ રૂપિયા વર્ષ ૨૦૨૫-૨૬ ના બજેટમાં ફાળવ્યા છે ત્યારે મોરબી મહાપાલીકાની માળખાકીય સુવિધા તથા મહેક્રમ માટે રૂપિયા ૨૫૫ કરોડ ઉપલબ્ધ થશે. જેથી આવનારા દિવસોમાં મહાપાલીકામાં સમાવિષ્ટ વિસ્તારોમાં માળખાકીય સુવિધાઓ ઉભી કરવામાં આવશે. અને વિકાસ વેગવંતો બનશે.

મોરબીને જે રકમ રાજ્યના બજેટમાં ફાળવવામાં આવેલ છે તેમાંથી મુખ્યમંત્રી ગ્રીન રીંગ રોડ યોજના અંતર્ગત એક રીંગ રોડની સુવિધા ઉપલબ્ધ થશે. જેથી આવનારા દિવસોમાં લોકોની ટ્રાફિક સહિતની મુશ્કેલીઓમાં ઘટાડો થશે. જેથી રાજયના મુખ્યમંત્રી ભુપેન્દ્રભાઈ પટેલ તથા નાણામંત્રી કનુભાઈ દેસાઈનો ટંકારાના ધારાસભ્ય દુર્લભજીભાઈ દેથરીયાએ મોરબી મહાપાલીકાની સુવિધાઓ ઉપલબ્ધ કરાવવા બદલ આભાર વ્યકત કરેલ છે. અત્રે ઉલેખનીય છે કે, ધારાસભ્ય દુર્લભજીભાઈ દેથરીયાની રજુઆતને ધ્યાને લઈ મોરબી નવનિર્મિત મહાપાલીકાને માળખાકીય સુવિધા અને નવો રીંગ રોડ બનાવવા માટે બજેટમાંથી રકમ ફાળવવામાં આવેલ છે.