મોરબીમાં પરણિતા પાસે બીભત્સ માંગણી કરનારા શખ્સની ધરપકડ

મોરબીના વીસીપરા વિસ્તારની અંદર રોહીદાસપરામાંથી પસાર થતી પરણિતાને ગંદા ઇશારા કરીને તેની પાસે એક શખ્સ દ્વારા બીભત્સ માગણી કરવામાં આવી હતી જેથી પરિણીતાએ મોરબી સીટી બી ડિવિઝન પોલીસ સ્ટેશન ખાતે ફરિયાદ નોંધાવતા પોલીસે આરોપીની ધરપકડ કરેલ છે

જાણવા મળતી વિગત પ્રમાણે મૂળ વીસીપરા રોહીદાસપરાની અંદર રહેતી અને હાલમાં સામાકાંઠા વિસ્તારના અંદર રહેતી પરણીતા મોરબીના વીસીપરા વિસ્તારમાંથી પસાર થઈ રહી હતી ત્યારે વીસીપરામાં આવેલ રોહીદાસપરામાં રહેતા દિલીપભાઈ ખીમજીભાઈ ચૌહાણ નામના શખ્સ દ્વારા તેનો પીછો કરવામાં આવતો હતો અને પરણિતાને ગંદા ઇશારા કરીને ખરાબ વાતો કરતો હતો અને પરિણીતા પાસે બીભત્સ માગણી કરી હતી તેમજ પરિણીતાને આરોપી પોતાની સાથે સંબંધ રાખવા માટે ખોટી રીતે હેરાન કરતો હતો જેથી પરિણીતાએ મોરબી બી ડિવિઝન પોલીસ સ્ટેશન ખાતે ફરિયાદ નોંધાવી હતી જેના આધારે પોલીસે આઈપીસી કલમ ૩૫૪ (એ)મ ૩૫૪ (ડી) મુજબ ગુનો નોંધીને આરોપીને પકડવા માટે તજવીજ શરૂ કરી હતી અને હાલમાં કડીયાકામ કરતાં દિલીપભાઈ ખીમજીભાઈ ચૌહાણ (ઉમર ૩૮) રહે.રોહીદાસપરા મઢવાળી શેરી વીશીપરા પાસે મોરબી વાળાની ધરપકડ કરેલ છે.

યુવાન ઈજાગ્રસ્ત

હળવદમાં શિવ શક્તિ ઓટો ગેરેજ નજીક બસના ટાયરમાં પગ આવી જતાં મુળ મધ્યપ્રદેશના વતની અનિલ જગદીશભાઇ નામના યુવાનને ઇજાઓ થતાં તેને સારવાર માટે અહિંની આયુષ હોસ્પિટલે સારવાર માટે લાવવામાં આવ્યો હતો.જ્યારે ટંકારા તાલુકાના હડમતીયા ગામના વતની મનજીભાઈ ખીમજીભાઈ મેરજા નામના ૬૩ વર્ષીય વૃદ્ધ બાઈક લઈને જતા હતા ત્યારે ટંકારા નજીક તેમનું બાઇક સ્લીપ થઇ જતાં ઇજાઓ થવાથી તેઓને સારવાર માટે મોરબી લાવવામાં આવ્યા હોવાનું પોલીસસુત્રોમાંથી જાણવા મળેલ છે.

વૃદ્ધા સારવારમાં

હળવદના પંચમુખીનગર વિસ્તારમાં રહેતા પમુબેન પોપટભાઈ ભરવાડ નામના ૭૩ વર્ષીય વૃદ્ધા રાધાકૃષ્ણ મંદિરે જવા નીકળ્યા હતા અને તેઓ હળવદના જીઆઇડીસી પાસેથી બાઈકમાં પાછળના ભાગે બેસીને જતા હતા તે દરમિયાન બાઈક સ્લીપ થઈ જતાં ઇજાગ્રસ્ત પમુબેન ભરવાડને સારવાર માટે મોરબી ખસેડાયા હતા.જ્યારે વાંકાનેર તાલુકાના લુણસર ગામના આદેશગીરી મંગળગીરી સાધુ નામના ૫૫ વર્ષીય આધેડને ચીત્રાખડા અને લુણસરના રસ્તે વાહન અકસ્માતમાં ઇજાઓ થવાથી તેઓને સારવાર માટે અહીંની સદભાવના હોસ્પિટલે લાવવામાં આવ્યા હતા.