હળવદમાં જમીનના દલાલ પાસે દલાલીના પૈસા માંગીને ધોકા-પાઇપ વડે હુમલો

હળવદના દેવીપૂર ગામના જમીન મકાનના દલાલ પાસે જમીનની દલાલીના ૭૦ હજાર માંગવામાં આવ્યા હતા અને અત્યારે જ આપવા પડશે કહી ધોકા પાઇપ વડે તેના ઉપર હુમલો કરવામાં આવ્યો હતો અને આધેડને ઈજાઓ કરી હતી જેથી કરીને આધેડે બે શખ્સોની સામે હળવદ તાલુકા પોલીસ સ્ટેશને ફરિયાદ નોંધાવેલ છે

જાણવા મળતી માહિતી મુજબ હળવદના દેવીપુર ગામે રહેતા અને જમીન દલાલીનું કામ કરતા મુકેશભાઇ ભગવાનભાઇ સિણોજીયા (૫૫)એ હાલમાં હળવદ તાલુકા પોલીસ સ્ટેશને હળવદના પંકજભાઇ ચમનભાઈ ગોઠી અને રણમલપુરના કરશનભાઇ હરજીભાઇ પટેલ સામે ફરિયાદ નોંધાવી છે જેમાં જણાવ્યુ છે કે, આ આરોપીઓએ તેને ફોન કરી દેવીપુર ગામના પાટિયા પાસે બોલાવ્યા હતા અને ત્યાં જમીન દલાલીના ૭૦ હજાર આપવાનું કહ્યું હતું અને ફરિયાદીએ તેઓને કહ્યું હતું કે,  મેં કરાવેલ સોદામાં તમે ક્યાંય હતા નહીં તો દલાલી કેમ આપું ? જેથી કરીને બંને આરોપીઓએ તેના ઉપર પાઇપ તેમજ ધોકા વડે હુમલો કરીને માર માર્યો હતો અને જાનથી મારી નાખવા ધમકી આપી હતી જેથી કરીને આધેડે નોંધાવેલ ફરિયાદ આધારે પોલીસે ગુનો નોંધીને આરોપીને પકડવા માટે તજવીજ શરૂ કરી છે