મોરબી શહેરમાં કચરાના સ્ટેન્ડ પરથી કચરો ઉપડવા માટે કોન્ટ્રાક્ટ આપવામાં આવેલ છે જો કે, કોન્ટ્રાક્ટર દ્વારા છેલ્લા ૧ મહિના દરમ્યાન અનેક વિસ્તારમાંથી કચરો ઉપડવામાં આવેલ નથી તેમજ જે વાહનોનો ઉપયોગ કચરાના નિકાલ માટે કરવામાં આવે છે તે વાહનોમાં જીપીએસ સિસ્ટમ લાગવવામાં આવી નથી જેથી કરીને પાલિકાના ચીફ ઓફિસર દ્વારા કોન્ટ્રાક્ટરના બિલમાં બે લાખની કપાત કરવામાં આવી છે અને યોગ્ય રીતે કામ નહીં કરવામાં આવે તો કોન્ટ્રાક્ટરનો કોન્ટ્રાક્ટ રદ કરવામાં આવશે તેવી આખરી નોટિસ આપવામાં આવી છે

મોરબી શહેરમાં કચરાના સ્ટેન્ડ પરથી કચરો ઉપડવા માટે તા. ૨૪/૦૧/૨૦૨૨ થી અમદાવાદની શ્રીજી એજન્સીને કોન્ટ્રાક્ટ આપેલ છે જો કે, કોન્ટ્રાક્ટર દ્વારા શરત મુજબ કામગીરી કરવામાં આવી રહી નથી જેથી કરીને પાલિકાના ચીફ ઓફિસર સંદીપસિંહ ઝાલા દ્વારા કોન્ટ્રાક્ટરને શોકોઝ નોટિસ આપવામાં આવી છે જેમાં તેને જણાવ્યુ છે કે, કચરાના પોઈન્ટ ઉપરથી કચરાના નિકાલની કામગીરીમાં બેદરકારી દાખવવામાં આવી રહી છે અને કચરાના સ્ટેન્ડ પર જંતુનાશક દવાનો છંટકાવ કરવામાં આવતો નથી, દૈનિક કચરો નિયમિત રીતે સેનિટરી ઈન્સ્પેક્ટરની સૂચના મુજબ ડમ્પ સાઇટ પર ઠાલવાતો નથી અને લીલાપર રોડ પર ઠાલવવામાં આવે છે,

આટલું જ નહીં શહેરી વિસ્તારમાં કચરાના પોઈન્ટ ઉપરથી સો ટકા કચરાનો નિકાલ કરવાની શરતે કામ આપવામાં આવ્યું છે જો કે, ગેંડા સર્કલ,  એવન્યુ પાર્ક, સર્કિટ હાઉસ સામે, વોરાબાગ સામે, વાવડી રોડ, નકલંક હોસ્પિટલ પાસે, વાવડી ચોકડી, ગર્લ્સ હાઇસ્કૂલની દીવાલ પાસે, લાતી પ્લોટ, સોઑરડી, ત્રાજપર ચોકડી, કારીયા સોસાયટી, જનકલ્યાણ નગર, વીશીપરા, પ્રકાશના કારખાના પાસે, મહેન્દ્રસિંહજી હોસ્પિટલ, બીઆરસી ભવન, માધાપરનો ઝાપો, રોહિદાસપરા, બાલમંદિર, મંગલમ હોસ્પિટલ, રબારીવાસ, મતવાચોક વિગેરે સ્થળે યોગી રીતે કચરો ઉપડવામાં આવતો નથી અને સેનેટરી ઈન્સ્પેકટર તથા ચીફ ઓફિસરની રાઉન્ડ દરમિયાન માલૂમ પડેલ કે, છેલ્લા ૧ મહિના દરમિયાન ૬૬૭ ટન જેટલો કચરો ઉપાડેલ નથી.

જેથી કરીને ન ઉપડેલ કચરા માટે પ્રતિ ટન ૩૦૦ રૂપિયા કપાત કરતાં કુલ મળીને ૨,૦૦,૧૦૦ જેટલી કપાત કરવામાં આવેલ છે અને હાલમાં જે વાહનોનો ઉપયોગ કચરાના નિકાલ માટે કરવામાં આવે છે તે વાહનોમાં જીપીએસ સિસ્ટમ લાગવાની હોય છે જે હજુ સુધી કોન્ટ્રાક્ટરે લગાવેલ નથી માટે પાલિકાના ચીફ ઓફિસર દ્વારા કોન્ટ્રાક્ટરને આખરી નોટીસથી સૂચના આપવામાં આવેલ છે અને જો કોન્ટ્રાક્ટર તેના કામમાં તાત્કાલિક ધોરણે સુધારો કરશે નહિ તો કોન્ટ્રાક્ટ રદ કરવામાં આવશે તેવું જાણવા મળેલ છે.