મોરબીના શનાળા નજીક કૂવામાં ડૂબી જતા યુવાનનું મોત

17-02-2022 10:52 AM

મોરબીના શનાળા નજીક કૂવામાં ડૂબી જતા યુવાનનું મોત

મોરબીના રાજકોટ હાઇવે ઉપર સકત સનાળા ગામ પાસે આવેલ કારખાનામાં રહીને મજૂરી કામ કરતો મૂળ બીહારી મજુર યુવાન કૂવામાં પડી જતાં તેનું મોત નીપજ્યું હોવાનું જાણવા મળેલ છે.

મોરબી સીટી એ ડીવીઝન પોલીસ મથકના સૂત્રોમાંથી મળતી માહિતી મુજબ મુળ બિહારનો અને હાલ મોરબી નજીકના સકત સનાળા ગામે આવેલ જેનિસ રીકલેમેશન નામના ટાયરના કારખાના લેબર કવાટરમાં રહેતો જીતેન્દ્રકુમારસિંહ કપિલસિંહ ચંદ્રવંશી (ઉમર વર્ષ ૨૫) નામનો યુવાન ગઇકાલે રાત્રીના સાડા આઠેક વાગ્યાના અરસામાં સનાળા ગામે કારખાના પાસે આવેલ કૂવામાં કોઈ કારણોસર પડી ગયો હતો અને ડૂબી જવાથી જીતેન્દ્રકુમારસિંહ ચંદ્રવંશીનું મોત નીપજયું હતું બનાવને પગલે એ ડિવિઝન પોલીસ સ્ટાફે બનાવની નોંધ કરીને આગળની તપાસ હાથ ધરી છે.

વાહન અકસ્માતમાં ઈજા

ટંકારા તાલુકાના મિતાણા ગામે રહેતો મનીષ સોમલાભાઈ નામનો ૨૨ વર્ષીય યુવાન ગઇકાલે સાંજે પાંચેક વાગ્યે મીતાણા ચોકડી પાસે હતો ત્યાં તે રિક્ષામાંથી અકસ્માતે નીચે પડી જતાં ઇજાગ્રસ્ત મનીષને સારવાર માટે અત્રેની આયુષ હોસ્પિટલે લાવવામાં આવ્યો હતો.જ્યારે મોરબીની વજેપર શેરી નંબર ૧૬ માં રહેતો વિજય રવજીભાઈ પરમાર નામનો ૩૮ વર્ષીય યુવાન બાઇક લઇને રવાપર રોડ ઉપરથી જતો હતો ત્યારે રસ્તામાં તેનું બાઇક સ્લીપ થઇ જતાં ઇજાગ્રસ્ત વિજય પરમારને પણ સારવાર માટે અહીંની આયુષ હોસ્પિટલે ખસેડવામાં આવ્યો હતો.

વૃદ્ધા સારવારમાં

મોરબીના નાની બજાર વિસ્તારમાં રહેતા હસીનાબેન સલેમાનભાઈ બ્લોચ નામની ૭૦ વર્ષીય વૃદ્ધ પોતાના પુત્રના બાઈકમાં પાછળના ભાગે બેસીને ઘરેથી દવા લેવા માટે જઈ રહ્યા હતા ત્યારે રસ્તામાં તેઓ બાઈકના પાછળના ભાગેથી નીચે પડી જતા ઈજાગ્રસ્ત થયેલા હસીનાબેનને સારવાર માટે ખસેડાયા હતા. જ્યારે મોરબી-વાંકાનેર હાઇવે ઉપર આવેલ ઢુવા ગામે સરતાનપર રોડ ઉપરના સંસ્કાર સીરામીક પાસે બનેલ વાહન અકસ્માતના બનાવમાં ઇજાઓ થવાથી દિપક પ્રભુભાઈ બગાના નામના ૧૬ વર્ષીય યુવાનને સારવાર માટે અત્રેની સદભાવના હોસ્પિટલે લાવવામાં આવ્યો હતો જેથી એ ડીવીઝન પોલીસે પ્રાથમિક તપાસ કરીને બનાવ સંદર્ભે વાંકાનેર તાલુકા પોલીસને જાણ કરી હતી.