હળવદ માર્કેટ યાર્ડમાં વેપારીની દુકાને આવીને કોંઢના શખ્સે માંગી ૯૦ લાખની ખંડણી

હળવદ માર્કેટ યાર્ડમાં દુકાન ધરાવતા વેપારીની દુકાને આવીને કોંઢ ગામના એક શખ્સ દ્વારા ધમકી આપીને ૯૦ લાખ રૂપિયાની ખંડણી માંગવામાં આવી છે જેથી કરીને ભોગ બનેલા યુવાને હાલમાં હળવદ તાલુકા પોલીસ સ્ટેશને ફરિયાદ નોંધાવતાં પોલીસે ગુનો નોંધીને ખંડણી માંગનારા શખ્સને પકડવા માટે તજવીજ શરૂ કરેલ છે

બનાવની જાણવા મળતી માહિતી મુજબ મુળ રાયસંગપરના રહેવાસી અને હાલમાં હળવદના વસંત પાકૅમાં રહેતા અને હળવદ માર્કેટ યાર્ડમાં દુકાન ધરાવતા વેપારી જનકભાઇ ઘનશ્યામભાઇ ચૌહાણ જાતે દલવાડી (ઉ.૩૭)એ યશપાલસિંહ ઝાલા રહે. કોંઢ વાળાની સામે ફરિયાદ નોંધાવી છે જેમાં તેઓએ જણાવ્યુ છે કે, આરોપીએ પહેલા તેઓને રૂબરૂ મળવા માટે ફોન કર્યો હતો જો કે, સાતમ આઠમની રજાઓ હોવાથી તે ગામડે ગયા હતા અને ત્યાર બાદ આરોપી તેની દુકાને આવેલ અને કોઈ પણ જાતની ચર્ચા વગર આરોપીએ તેને મારી નાખવાની ધમકી આપીને ૯૦,૦૦,૦૦૦ ની માંગણી કરી હતી અને ખંડણી માગી બળજબરીથી રૂપિયા કઢાવી લેવા માટે ધમકી આપી હતી જેથી હાલમાં યુવાનની ફરિયાદ લઈને પોલીસે ઇ.પી.કો. કલમ ૩૮૭ મુજબ ગુનો નોંધીને આરોપીને પકડવા માટે ચક્રોગતિમાન કરેલ છે